ٹھٹھہ،باغی ٹی وی (نامہ نگاربلاول سموں کی رپورٹ) ڈپٹی کمشنر منور عباس سومرو کی زیر صدارت پولیو کے خاتمے کے حوالے سے اجلاس منعقد ہوا، جس میں پولیو مہم کے دوران موثر کردار ادا کرنے کی تاکید کی گئی۔ اجلاس میں ڈپٹی کمشنر نے میونسپل، ٹاؤن کمیٹیز اور یونین کونسلز کے چیئرمینز پر زور دیا کہ وہ انسداد پولیو مہم کے دوران ایریا انچارجز اور پولیو ورکرز کی نگرانی اور مدد کو یقینی بنائیں اور کمزوریوں کی نشاندہی کریں تاکہ ضلع سے پولیو کا مکمل خاتمہ کیا جا سکے۔
ڈپٹی کمشنر نے کہا کہ پولیو وائرس کی گردش تیز ہے اور ضلع کو ہر حالت میں پولیو سے پاک کرنا ہے۔ چیف سیکریٹری سندھ کی ہدایت پر تحصیل سطح پر مختیارکار، ٹاؤن افسر اور مقامی یا صوبائی ملازمین جبکہ یونین کونسل سطح پر تپیدار، سٹی سرویئر، سب رجسٹرار، یو سی سیکریٹری اور دیگر متعلقہ ملازمین پر مشتمل سپورٹ ٹیمیں تشکیل دی گئی ہیں تاکہ ایریا انچارجز اور فرنٹ لائن ورکرز کی مدد کی جا سکے۔
اجلاس میں ڈپٹی کمشنر نے سب تحصیل اور یونین کونسل سپورٹ ٹیموں کو ہدایت کی کہ وہ نوٹیفکیشن کے تحت ضابطہ اور ذمہ داریوں پر عملدرآمد کو یقینی بنائیں۔ تمام اسسٹنٹ کمشنرز کو بھی ہدایت کی گئی کہ وہ تحصیل سطح پر ٹاؤن چیئرمنز اور متعلقہ اداروں سے اجلاس منعقد کریں اور مہم کی نگرانی کریں۔ انکاری والدین اور معززین کو بچوں کو پولیو کے قطرے پلانے پر آمادہ کریں تاکہ کوئی بچہ قطرے پینے سے محروم نہ رہے۔
اجلاس کے دوران این اسٹاپ افسر ڈاکٹر راجیش کمار نے تفصیلی بریفنگ دی اور تحصیل و یو سی سپورٹ ٹیموں کو اپنی ذمہ داریوں سے آگاہ کیا۔ ٹاؤن اور یو سی چیئرمنز نے ڈپٹی کمشنر کو قومی فریضے میں بھرپور تعاون کی یقین دہانی کرائی۔
اجلاس کے اختتام پر، ڈی سی آفس سے پبلک پارک مکلی تک عوام میں پولیو کے بارے میں آگاہی اور شعور بیدار کرنے کے لئے آگاہی واک کی گئی۔ مزید برآں، ڈپٹی کمشنر اور ڈی ایچ او نے سول اسپتال مکلی میں بچوں کو پولیو کے قطرے پلا کر مہم کا افتتاح کیا۔ اس موقع پر سول سرجن ڈاکٹر سید یامین شاہ، مرف کے نمائندہ ڈاکٹر داؤڈ ہیلایو اور دیگر بھی موجود تھے۔
