فیصل آباد:وفاقی وزیرداخلہ رانا ثنا اللہ کا کہنا ہےکہ جیل بھرو تحریک عمران خان کے لئے ڈوب مرو تحریک بن گئی ہے۔فیصل آباد میں میڈیا سے بات کرتے ہوئے رانا ثنا اللہ کا کہنا تھا کہ عمران خان کبھی اسلام آباد پر حملہ آور ہوتا ہے تو کبھی اسلام آبادسیل کرنے کی دھمکی دیتا ہے، ناکامیوں کے بعد اسمبلیاں توڑنے کا حربہ استعمال کیا۔
راناثنااللہ نے کہا کہ عمران خان نے پونے 4 سال مسائل پیدا کرنے کی کوشش کی اور اب مسائل بڑھانے کی کوشش کررہا ہے،ہم ملک کومسائل سے نکالنے کی کوششوں میں لگے ہیں۔
وزیر داخلہ کا کہنا تھا کہ جیل بھرو تحریک عمران خان کے لئے ڈوب مرو تحریک بن گئی ہے جیل بھروتحریک میں کل ملاکر 100، سوا سو آدمی اکٹھے ہوئے ہیں، ان میں سے بھی 80 فیصد ایسے ہیں جو کہتے ہیں ہمیں چھوڑ دیں، وہ کہتے ہیں کہ یہ لوگ ہمیں ورغلاکر لے آئے ہیں۔
دوسری طرف جیل بھرو تحریک کے پانچویں دن پاکستان تحریک انصاف کے رہنما آج گوجرانوالہ میں گرفتاریاں دیے رہے ہیںپاکستان تحریک انصاف نے اپنی تحریک کے پانچویں روز گوجرانوالہ سے گرفتاریاں دینے کا اعلان کیا ہے۔
میڈیا رپورٹس کے مطابق گوجرانوالہ میں پی ٹی آئی کے 10 عہدیدار اور 200 کارکن گرفتاریاں پیش کریں گے، اس سلسلے میں کارکن پی ٹی آئی گوجرانوالہ سٹی کے صدر خالد عزیز لون کی رہائش گاہ پر جمع ہونا شروع ہوگئے ہیں۔
پاکستان تحریک انصاف نے گزشتہ ہفتے (22 فروری سے) اپنی جیل بھرو تحریک کا آغاز کیا تھا۔ جیل بھرو تحریک کے پہلے دن لاہور سے شاہ محمود قریشی، اعظم سواتی اور اسد عمر سمیت کئی رہنماؤں اور کارکنوں نے گرفتاریاں دیں۔لاپور کے بعد راولپنڈی سے بھی تحریک انصاف کے رہنماؤں کی جانب سے گرفتاریاں دی گئیں لیکن ملتان اور پشاور سے کوئی گرفتاری عمل میں نہیں آئی۔