بھٹو شہیداور نوازشریف نے ملکی دفاع ناقابل تسخیر بنا یا،تجزیہ ،شہزاد قریشی

بھٹو شہیداور نوازشریف نے ملکی دفاع ناقابل تسخیر بنا یا
دونوں شخصیات نے ملک سنوار دیا،آج کی سیاست میں صرف منافقت رہ گئی
مریم نواز نے نوجوانوں کو لیپ ٹاپ دیکر دل جیت لئے ،مقبولیت کی بلندیوں پر پہنچ گئیں
ایٹمی صلاحیت سے دشمن کی ہر چال ناکام،افواج پاکستان نے ناقابل تسخیر نعرے کو امر کردیا
تجزیہ ،شہزاد قریشی
دوسری جنگ عظیم کے بعد دنیا بھر کے ملکوں کے درمیان جنگی ماحول رہا، بڑی طاقتوں نے ذاتی مفادات کے لئے ایسے حالات پیدا کردئیے کہ دنیا کو جنگ میں دھکیل دیا گیا، کئی ایسی جنگیں لڑی گئیں جن کی ضرورت نہیں تھی ،عالمی طاقتوں نے کمزور بہانے تراش کر چھوٹے ملکوں پر دانستہ جنگیں تھوپیں، چھوٹے ممالک کے وسائل پر قبضے کئے، تیل کی قیمتوں کو گرنے سے بچانے کے لئے بھی جنگوں کا سہارا لیا گیا، دنیا کے کئی چھوٹے ممالک نے اپنے آپ کو مضبوط کرنے کے لئے دفاع کو مضبوط کرنا شروع کیا، دفاعی بجٹ میں اضافہ کیا ، جدید ٹیکنالوجی حاصل کی تاکہ عالمی طاقتوں کے شکنجے سے محفوظ رہ سکیں، اس میں دنیا کی سیاسی لیڈر شپ کا بڑا کردار رہا ،پاکستان نے بھی دنیا کی بدلتی صورتحال کو دیکھا اور ایک سیاسی قد آور شخصیت ذوالفقار بھٹو شہیدنے ملک و قوم کو محفوظ کرنے کے لئے جوہری قوت کو سمجھا اور ایٹمی پاور بننے کا منصوبہ بنایا اور اسکی بنیاد رکھی اور پھر ایک قد آور سیاسی شخصیت نواز شریف نے ایٹمی دھماکے کرکے اقوام عالم اور پاکستان کے ازلی دشمن بھارت کو بتا دیا کہ پاکستان آج ایٹمی قوت کا حامل ملک بن چکا ہے، اسے کہتے ہیں سیاسی لیڈر شپ اور قومی ہیرو، عالمی غنڈہ گردی سے ملک وملت کو بچانے پر قوم ان دو سیاسی کرداروں کوہمیشہ یاد رکھے گی ،موجودہ سیاست دانوں کو بھٹو شہید کی سیاسی زندگی کا مطالعہ کرنا چاہیے جبکہ دوسرا کردار نواز شریف ہیں ،اللہ پاک نواز شریف کو زندگی دے وہ لاہور اپنے گھر جاتی امراء میں موجود ہیں، اگر ان دونوں سیاسی شخصیات کا کردار نہ ہوتا تو آج پاکستان بھارتی فسطائی عزائم کا شکار ہو چکا ہوتا، دوسرا ہماری پاک فوج جو جذبہ جہاد کے تحت ملک کی سلامتی کی حفاظت پر مامور ہے، سرحدوں پر موجود پاک فوج کے نوجوان اور افسران شہید کا رتبہ حاصل کرنے کے لئے کھڑے ہیں، اگر جمہوریت کی بات کی جائے توآج کے دور میں سیاسی گلیاروں میں کوئی نظریاتی سیاست کو تلاش کر رہا ہے تو یہ بہت بڑا جھوٹ ہے، نظریاتی سیاست کا جنازہ کب کا اٹھ چکا ہے، آج کل سیاست کی صرف باتیں رہ گئی ہیں ،سیاسی صلاح کار اور جوڑ توڑ کے ماہر ملکی سیاست کے بڑے نام اپنی اپنی اننگز کھیل گئے ہیں، ملک میں صرف ایک نام باقی رہ گیا ہے وہ نواز شریف ہیں، آمدہ قومی انتخابات میں ن لیگ کے وزراء مشیر اور دیگر نواز شریف اور انکی بیٹی مریم نواز جو عوام میں مقبول ہیں وہ جلسے جلوسوں میں عوام کے سامنے لاکر ووٹ لیں گے مریم نواز نے آج کے پنجاب کو کالجوں یونیورسٹیز میں جاکر نوجوان طبقہ جن کو گمراہ کیا گیا تھا ان کے ہاتھوں میں لیپ ٹاپ اور کتاب دی ہے جن سیاسی شخصیات نے نوجوانوں کے ہاتھوں میں غلیل دی تھی ان کو جدید تعلیم حاصل کرنے کی طرف لگا دیا ہے-