اوچ شریف:مقامی تھانہ کی عمارت کی چھت جھولنے لگے،گرنے کاخطرہ

اوچ شریف (باغی ٹی وی,نامہ نگارحبیب خان) اوچ شریف تھانے کی عمارت کی خستہ حالی نے شہریوں اور سیکیورٹی اہلکاروں میں شدید تشویش پیدا کر دی ہے۔ تھانے کی چھت سے پلستر گرنے کے واقعے کے بعد یہ مسئلہ مزید شدت اختیار کر گیا ہے۔

شہریوں کا کہنا ہے کہ تھانے کی عمارت کی مرمت کے باوجود کوئی قابل ذکر بہتری نظر نہیں آئی اور یہ عمارت اب مزید نقصانات کا سبب بن سکتی ہے۔ انہوں نے حکام سے مطالبہ کیا ہے کہ تھانے کی نئی عمارت کی تعمیر کی جائے تاکہ عوام اور سیکیورٹی اہلکاروں کی حفاظت کو یقینی بنایا جا سکے۔

محمد ساجد نامی ایک مقامی شہری نے کہا کہ یہ عمارت عوام کی حفاظت کے لیے مناسب نہیں ہے۔ تھانے کی نئی عمارت کی ضرورت ہے اب اس کی مزید لیپا پوتی کی گنجائش نہیں رہی، حکومت کو فوری طور پر اس مسئلے کا حل تلاش کرنا چاہیے۔”

سیکیورٹی اہلکار بھی اس صورتحال سے پریشان ہیں اور ان کا کہنا ہے کہ عمارت کی موجودہ حالت ان کی کام کرنے کی صلاحیت پر منفی اثر ڈال رہی ہے اورخطرہ رہتا ہے کسی بھی وقت اوپر سے کچھ گرسکتا ہے.