گیدڑ بھبکیاں بے نقاب، بھارت کی جنگی تیاریوں کا پول کھل گیا، دعوے بڑے مگر ٹینک خالی
بھارتی فوج کی جنوبی مغربی کمانڈ سے لیک ہونے والی ایک خفیہ دستاویز نے سنسنی خیز انکشافات کیے ہیں۔ رپورٹ کے مطابق، پاکستان کے ساتھ مغربی سرحد پر تعینات بھارتی افواج کو ٹینکوں میں استعمال ہونے والے عام اور نسبتاً سستے گولہ بارود کی بھی شدید قلت کا سامنا ہے۔
اس تشویشناک کمی کی بنیادی وجہ بھارتی فوج کی جانب سے حالیہ دنوں میں بڑی مقدار میں ٹینکوں کا اسلحہ چین کے ساتھ شمالی سرحد پر منتقل کرنا بتائی گئی ہے۔
تاہم، اس دستاویز میں درج ایک بھارتی کمانڈر کا بیان سب سے اہم اور قابلِ غور ہے۔ کمانڈر نے انتہائی بنیادی اور عام دستیاب بارود کی قلت پر اپنی گہری تشویش کا اظہار کیا ہے، جو بھارت کی جنگی تیاریوں پر ایک بڑا سوالیہ نشان کھڑا کرتا ہے۔
حیران کن طور پر، ایسی صورتحال میں جب بھارت کے پاس بنیادی گولہ بارود بھی ناکافی ہے، وہ بیک وقت دو محاذوں – شمال میں چین اور مغرب میں پاکستان – کے خلاف جنگ کی تیاریوں میں مصروف ہے۔ یہ انکشاف بھارتی فوج کی جنگی حکمت عملی اور تیاریوں پر سنگین اثرات مرتب کر سکتا ہے۔
