پیرمحل : سندیلیانوالی میں نامعلوم چور دو موٹر سائیکل لے اڑے مقدمات درج

پیرمحل : سندیلیانوالی میں نامعلوم چور دو موٹر سائیکل لے اڑے مقدمات درج ۔
باغی ٹی وی (وقاص شریف نامہ نگار) تفصیلات کے مطابق: موٹر سائیکل چوری کی پہلی واردات بستی بہار شاہ کے رہائشی سکندرعلی کے ساتھ ہوئی جو امام بارگاہ بستی باقر آباد مجلس سننے کے لیے آیا اور اپنی موٹرسائیکل امام بارگاہ کے باہر کھڑی کی جب وہ مجلس سن کر واپس آیا تو موٹرسائیکل غائب تھی اُس نے ذاتی طور پر موٹر سائیکل کی جانچ پڑتال شروع کی تو اسے مجاہد اور تصور عباس جو کہ مقامی افراد ہیں نے بتایا کہ انہوں نے علمدار ولد زوار حسین کو موٹر سائیکل لے جاتے ہوئے دیکھا ہے جس پر سکندر علی نے علمدار سے رابطہ کیا جس نے بڑی مشکل سے موٹرسائیکل چوری کرنا تسلیم کیا اور واپس کرنے کا بھی وعدہ کیا مگر بار بار رابطہ کرنے پر بھی اس نے موٹر سائیکل واپس نہ کی جس پر سکندر علی نے تھانہ اروتی کو درخواست دے دی اور ملزم کو نامزد کر کے مقدمہ درج کرا دیا ۔۔ دوسری واردات میں موضع نواب بھوتی کے رہائشی غلام شبیر نے تھانہ اروتی کو درخواست گزاری کہ اُس کا بیٹا معمول کے مطابق صبح سویرے اپنے سکول ایور گرین سند یلیا نوالی گیا اور موٹر سائیکل مخصوص جگہ کھڑی کی جب بریک کے وقت اُس نے موٹر سائیکل چیک کیا تو وہ غائب تھا ۔ تمام تر کوشش کے باوجود موٹر سائیکل کہیں نہ ملا اس طرح وہ ایک لاکھ روپے کی مالیت کی موٹر سائیکل سے محروم ہو گیا نامعلوم چور وہ موٹر سائیکل اٹھانے میں بھی کامیاب ہو گئے تھانہ اروتی نے مقدمہ درج کر لیا ۔۔ واضح رہے کہ گزشتہ چند ہفتوں سے تھانہ اروتی کے ایریا میں موٹر سائیکل غائب کرنا بائیں ہاتھ کا کھیل بن چکا ہے ۔ نامعلوم ملزمان پلک جھپکتے ہی موٹر سائیکل نہ صرف اٹھا لیتے ہیں بلکہ ایسا غائب کرتے ہیں کہ انسانی آنکھ اُسے ڈھونڈ نہیں پاتی ۔ بد قسمتی سے ہماری پولیس بھی اس گینگ کو پکڑنے میں مسلسل ناکام رہی ہے