کراچی: وفاقی تحقیقاتی ادارے (ایف آئی اے) کے کارپوریٹ کرائم سرکل نے شہر کے علاقے سمن آباد میں ایک خفیہ اطلاع پر کارروائی کرتے ہوئے غیر قانونی کرنسی اسمگلنگ اور غیر رجسٹرڈ کرنسی ایکسچینج کے کاروبار میں ملوث تین افراد کو گرفتار کرلیا۔
ترجمان ایف آئی اے کے مطابق گرفتار ملزمان کی شناخت مدثر، سجاد اور خالد کے ناموں سے ہوئی ہے، جو کافی عرصے سے بغیر لائسنس کرنسی ایکسچینج اور غیر قانونی طریقے سے غیر ملکی کرنسی کی خرید و فروخت میں ملوث تھے۔
حکام کے مطابق چھاپے کے دوران ملزمان کے قبضے سے بڑی مقدار میں غیر ملکی کرنسی برآمد ہوئی، جس میں 18 ہزار سعودی ریال،10 ہزار امریکی ڈالر،5 ہزار برطانوی پاؤنڈشامل ہیں،اس کے علاوہ 63 لاکھ 45 ہزار پاکستانی روپے بھی برآمد کیے گئے جو غیر قانونی ٹرانزیکشنز سے حاصل شدہ رقم بتائی جاتی ہے۔ایف آئی اے کا کہنا ہے کہ ملزمان سے غیر قانونی کرنسی ایکسچینج کے کاروبار سے متعلق اہم دستاویزات، ڈیجیٹل ریکارڈ اور دیگر شواہد بھی قبضے میں لیے گئے ہیں، جن کے ذریعے ان کے نیٹ ورک اور ممکنہ سہولت کاروں سے متعلق مزید معلومات حاصل کی جارہی ہیں۔
ایف آئی اے نے تینوں ملزمان کے خلاف باقاعدہ مقدمہ درج کرلیا ہے، جبکہ انہیں ریمانڈ کے لیے عدالت میں پیش کیا جائے گا۔ حکام کے مطابق تفتیش کے دوران انکشافات کی روشنی میں مزید گرفتاریاں بھی متوقع ہیں۔ادارے کا کہنا ہے کہ غیر قانونی کرنسی سمگلنگ نہ صرف ملکی معیشت کو نقصان پہنچاتی ہے بلکہ منی لانڈرنگ کے نیٹ ورکس کو بھی تقویت دیتی ہے، اس لیے اس قسم کی کارروائیاں مستقبل میں بھی جاری رہیں گی۔
