تھانہ روات کے علاقے میں ایک افسوسناک واقعہ پیش آیا جہاں 16 سالہ لڑکی کو مبینہ طور پر اس کے باپ نے قتل کر دیا۔ پولیس کے مطابق ابتدائی تفتیش میں یہ بات سامنے آئی ہے کہ لڑکی کے والد نے اسے موبائل فون پر ٹک ٹاک اکاؤنٹ ڈیلیٹ کرنے کا کہا تھا، تاہم جب لڑکی نے اکاؤنٹ نہ ڈیلیٹ کیا تو والد نے فائرنگ کر کے اسے ہلاک کر دیا۔
واقعے کے بعد ابتدائی طور پر فیملی نے لڑکی کی موت کو خودکشی ظاہر کرنے کی کوشش کی، لیکن پولیس کی جانچ پڑتال کے دوران حقائق سامنے آ گئے۔ پولیس نے موقع واردات سے شواہد اکٹھے کر کے مزید تحقیقات شروع کر دی ہیں۔ایف آئی آر میں درج ہے کہ ملزم نے اپنی بیٹی کو زبردستی اکاؤنٹ ڈیلیٹ کرنے کا کہا، جب کہ لڑکی کے انکار پر اس نے گولی چلا دی۔ واقعے کے بعد ملزم فرار ہو گیا ہے اور پولیس اس کی گرفتاری کے لیے کارروائی کر رہی ہے۔پولیس کا کہنا ہے کہ مقتولہ کی عمر صرف 16 سال تھی اور یہ واقعہ سماجی و خاندانی مسائل کی پیچیدگیوں کو اجاگر کرتا ہے۔ پولیس نے عوام سے اپیل کی ہے کہ ایسے معاملات میں جلد اطلاع دیں تاکہ جان لیوا واقعات کو روکا جا سکے۔
