ٹک ٹاک کا اپنے نو عمر صارفین کی حفاظت کےلئے نیا فیچر متعارف کرانے کا اعلان

چینی ویڈیو شیئرنگ ایپ ٹک ٹاک نے اپنے نو عمر صارفین کی حفاظت کے لیے نیا فیچر متعارف کروانے کا اعلان کیا ہے۔

باغی ٹی وی :ٹک ٹاک چین کی بائٹ ڈانس کی ملکیت ہے اور یہ دنیا میں مقبول ترین سوشل میڈیا ایپس میں سے ایک ہے دنیا کے 150 ممالک میں ٹک ٹاک کے ایک ارب سے زیادہ صارفین موجود ہیں امریکہ میں اب تک 200 ملین سے زائد باراس ایپلیکیشن کو ڈاؤن لوڈ کیا جا چکا ہے بچہ بڑے نوجوان سب ہی اس ایپ کے فین ہیں جہاں اس ایپ کو مقبولیت ملی وہیں آئے دن یہ مختلف تنازعوں کا شکار رہتی ہے پاکستان میں اس ایپ پر کئی دفعہ پابندیاں لگ چکی ہیں-

تاہم یہ ایپ صارفین کی شکایات دور کرنے اور نت نئی سہولتیں دینے کے لئے اپنے نئے نئے فیچر متعارف کراتی رہتی ہے تاہم اب بھی ٹاک ٹاک نے اپنے نو عمر صارفین کی فلاح و بہبود کی حفاظت کے لیے نیا فیچر متعارف کروانے کا اعلان کیا ہے۔

رپورٹ کے مطابق ٹک ٹاک کے نئے فیچر میں 13 سے 15 سال کے صارفین کو رات 9 بجے اور 16 سے 17 سال کے صارفین کو رات 10 بجے کے بعد کوئی نوٹیفیکیشن نہیں ملے گا۔

ٹک ٹاک انتظامیہ کا کہنا ہے کہ ٹک ٹاک کا نیا فیچر نو عمر صارفین کے کام ، مطالعہ اور آرام کو زیر نظر رکھ کر بنایا گیا ہے ٹک ٹاک کے نئے فیچر کا مقصد نوجواں نسل کو مثبت ڈیجیٹل عادات کے آغاز میں مدد فراہم کرنا ہے۔

نیشنل سوسائٹی برائے آن لائن چائلڈ سیفٹی کے سربراہ نے کہا ہے کہ ٹک ٹاک انڈسٹری لیڈر شپ دکھا رہا ہے جو نوجواں نسل کے لیے فائدے مند ثابت ہو گی۔

اس سے قبل ٹک ٹاک نے اسنیپ چیٹ اسٹوریز کی طرز پر 24 گھنٹے میں اسٹوری غائب ہونے والے فیچر محدود پیمانے پر متعارف کروایا تھا۔ اس فیچر سے ٹک ٹاک کی اسٹوری میں لگایا گیا مواد 24 گھنٹے بعد خود غائب ہوجاتا ہے۔