کوئٹہ(باغی ٹی وی )مغربی ہواؤں کا سسٹم بلوچستان میں داخل ہوتے ہی کوئٹہ سمیت مختلف علاقوں میں موسلادھار بارش ہوئی جبکہ بالائی مقامات پر ژالہ باری اور برفباری ریکارڈ کی گئی۔
بارش کے باعث بلوچستان کے کئی شہروں میں بجلی اور مواصلاتی نظام متاثر ہوگیا۔ چمن اور گردونواح میں بھی تیز بارش سے معمولات زندگی متاثر ہوئے۔
پنجاب کے مختلف شہروں بشمول ڈیرہ غازیخان، لاہور، ملتان اور چیچہ وطنی میں بھی بارش ہوئی جبکہ شمالی و جنوبی وزیرستان میں بھی بادل برسے۔
محکمہ موسمیات کے مطابق بارشوں کا یہ سلسلہ 2 مارچ تک جاری رہے گا، جس کے تحت اسلام آباد، پنجاب، خیبر پختونخوا، گلگت بلتستان اور کشمیر میں بارش اور پہاڑی علاقوں میں برفباری متوقع ہے۔
اس کے علاوہ سندھ کے شہروں لاڑکانہ، قمبر شہداد کوٹ، جیکب آباد اور سکھر میں آج اور کل ہلکی بارش کا امکان ہے۔
