بانی پی ٹی آئی عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی سماعت 27 فروری تک ملتوی کردی گئی ہے۔
سپیشل جج سینٹرل شاہ رخ ارجمند نے عمران خان اور بشریٰ بی بی کے خلاف کیس کی سماعت ملتوی کرنے کا فیصلہ کیا۔ بانی پی ٹی آئی کے وکیل نے تصدیق کی کہ عدالتی عملہ نے صبح باضابطہ طور پر اس بات سے آگاہ کیا کہ کیس کی سماعت ملتوی کر دی گئی ہے۔
یاد رہے کہ اس کیس میں اب تک مجموعی طور پر 8 گواہوں کے بیانات قلمبند ہو چکے ہیں، اور ان میں سے 7 گواہوں پر جرح مکمل کی جا چکی ہے۔ گزشتہ سماعت کے دوران بانی پی ٹی آئی کے وکیل نے آٹھویں گواہ پر جرح کی تھی۔
اس کے علاوہ، بانی پی ٹی آئی کے وکیل نے جیل ٹرائل کی بجائے اوپن ٹرائل کی درخواست بھی عدالت میں دائر کی ہے۔ اس درخواست میں یہ استدعا کی گئی کہ اوپن ٹرائل کی درخواست پر فیصلہ ہونے تک توشہ خانہ ٹو کیس کی سماعت روکی جائے۔ اس درخواست پر عدالت نے فریقین کو نوٹس جاری کیے ہیں، اور اس میں سپرنٹنڈنٹ اڈیالہ جیل، ایف آئی اے، اور محکمہ داخلہ پنجاب کو فریق بنایا گیا ہے۔
