ننکانہ :بابا گورونانک یونیورسٹی سمیت تمام ترقیاتی منصوبوں میں شفافیت کو اہمیت دیں- ڈی سی

ننکانہ صاحب باغی ٹی وی ( نامہ نگار احسان اللہ ایاز )حکومت پنجاب کی خصوصی ہدایت پربابا گورونانک یونیورسٹی ، سکولوں کی اپ گریڈیشن، گلیوں کی پی سی سی،نالہ جات کی تعمیراور رابطہ سڑکات کے تمام جاری ترقیاتی منصوبہ جات کی تکمیل میں متعلقہ افسران شفافیت کو اہمیت دیں اور ضلع بھر میں جاری تمام ترقیاتی منصوبہ جات کو پایہ تکمیل تک پہنچانے میں اپنی بہترین پیشہ وارانہ خدمات کو بروئے کار لائیں۔ ڈپٹی کمشنر ننکانہ صاحب احمر نائیک نے ان خیالات کا اظہار ضلع بھر میں جاری اور نئی ترقیاتی سکیموں کے حوالے سے خصوصی گفتگوکرتے ہوئے کیا ۔ ڈپٹی کمشنر ننکانہ احمر نائیک نے کہا کہ ننکانہ صاحب میں جاری عوامی افادیت کی تمام نامکمل ترقیاتی سکیموں کو جلد از جلد مکمل کیا جائے اوران ترقیاتی سکیموں میں بہترین کوالٹی کا تعمیراتی میٹریل استعمال کیا جائے۔ڈپٹی کمشنر ننکانہ نے تمام متعلقہ محکموں کو تنبیہ کرتے ہوئے کہا کہ ضلع بھر میں جاری تمام عوامی ترقیاتی سکیموں میں شفافیت اور ان میں استعمال ہونے والے میٹریل کے معیار پر کسی قسم کی کوئی بھی کوتاہی ناقابل معافی ہوگی