ترک صدر کا تباہ کن زلزلےکے باوجود انتخابات مقررہ وقت پر کرانے کا اعلان

انقرہ: ترک صدر نے ملک میں تباہ کن زلزلےکے باوجود انتخابات مقررہ وقت پر کرانے کا اعلان کردیا۔

باغی ٹی وی: ترک صدر سے حکمران جماعت کے اراکین پارلیمنٹ نے ملاقات کی جس میں گفتگو کرتے ہوئے طیب اردوان نے کہا کہ حکومت زلزلےکے بہانےصدارتی اور پارلیمانی انتخابات کی تاریخ مؤخرکرنےکا نہیں سوچ رہی۔

ترک صدر نے بدھ کے روز اعلان کیا ہےکہ انتخابات کے لیے تجویزکردہ 14 مئی کی تاریخ حتمی ہے اور زلزلے کے باوجود انتخابات وقت پرہوں گےکیونکہ ملک ابھی تک دو تباہ کن زلزلوں سے سنبھل رہا ہےجنہوں نے فروری کے اوائل میں اس کے جنوبی علاقے کے ایک بڑے حصے کو متاثر کیا۔

اردگان نے پارلیمنٹ میں اپنی پارٹی کے اراکین سے کہا کہ "وقت آنے والا ہے۔ یہ قوم 14 مئی کو وہ کرے گی جو ضروری ہے۔ خالی باتیں کرنے والوں کو کوئی کریڈٹ نہیں دیا جائے گا۔”

6 فروری کو آنے والے دو بڑے زلزلوں کے بعد جس میں بدھ تک ملک میں 45,000 سے زیادہ افراد ہلاک ہوئے اور املاک کو بھاری نقصان پہنچا، ترکی نے اس بات پر بحث شروع کر دی کہ آیا مئی یا جون میں ہونے والے انتخابات کو ملتوی کیا جانا چاہیے یا نہیں۔

جنوب مشرقی ترکی میں واقع اس شدید زلزلے نے 10 صوبے متاثر کیے، جہاں 13 ملین سے زیادہ افراد رہائش پذیر تھے۔ زلزلے کے جھٹکوں نے دسیوں ہزار عمارتیں بھی تباہ کر دیں، دسیوں ہزار ترک بے گھر ہو گئے۔

ڈیزاسٹر اینڈ ایمرجنسی مینجمنٹ اتھارٹی نے کہا کہ 6 فروری کے زلزلے سے متاثرہ علاقوں میں 11,000 سے زیادہ آفٹر شاکس آئے ہیں۔

ڈیزاسٹر ایجنسی کے مطابق زلزلے سے متاثرہ علاقوں سے تقریباً 20 لاکھ افراد کو محفوظ مقامات پر منتقل کیا گیا ہے۔