بھوت یا انسان؟ ٹوئنکل کھنہ نے بھارتی عورتوں کے لیے سب سے بڑا خطرہ بتا دیا،انہوں نے کہا کہ اگر بھارت میں خواتین کو بھوت اور مرد میں سے کسی ایک کا سامنا کرنا پڑے تو وہ بھوت کو ترجیح دیں ،
بالی ووڈ اداکارہ اور مصنفہ ٹوئنکل کھنہ نے اپنے حالیہ کالم میں بھارتی معاشرے پر ایک گہرا سوال اٹھایا ہے۔ انہوں نے کہا ہے کہ بھارتی خواتین بھوتوں سے زیادہ مردوں سے ڈرتی ہیں۔ ٹوئنکل نے فلم اسٹری 2 پر تبصرہ کرتے ہوئے کہا کہ بھارت میں خواتین کے لیے مردوں کا خوف بھوتوں کے خوف سے کہیں زیادہ حقیقی ہے۔
ٹوئنکل کھنہ نے کولکتہ میں ڈاکٹر کے ساتھ ہونے والے زیادتی کے واقعے کا حوالہ دیتے ہوئے کہا کہ ہارر فلمیں ان واقعات کے مقابلے میں کچھ بھی نہیں ہیں۔ ٹوئنکل نے مطالبہ کیا کہ بھارت میں ایسا ماحول بنایا جائے جہاں عورتیں آزاد ہوں اور مرد ان سے خوفزدہ ہوں۔
ٹوئنکل کھنہ نے حال ہی میں مصنفہ ہونے کا اعزاز حاصل کرنے کے بعد بھارتی اخبار میں اداکار راج کمار راؤ اور شردھا کپور کی بلاک بسٹر فلم ”اسٹری 2“ پر کالم لکھا۔اداکارہ ٹوئنکل کھنہ کی جانب سے ویمن اسٹارر مووی ”استری 2“ پر بات کرتے ہوئے کہا گیا کہ ’چندیری جیسی جگہ ہونی چاہیے جہاں عورتیں آزاد ہیں اور مرد خوفزدہ ہیں‘۔
اداکارہ ٹوئنکل کھنہ نے اپنے کالم میں کولکتہ کی ٹرینی ڈاکٹر کے ریپ اور قتل کے علاوہ بدلہ پور کے ایک اسکول میں چار سالہ دو بچوں کے ساتھ جنسی زیادتی جیسے واقعات کو بھی ہائی لائٹ کیا۔
اداکارہ ٹوئنکل کھنہ کی جانب سے اپنے کالم میں بتایا گیا کہ ’بھارت میں موجود خواتین اتنی زیادہ غیرمحفوظ ہیں کہ اگر کبھی ایسا ہو کہ ایک جگہ پر بھوت اور جنات ہوں اور دوسری جانب مرد حضرات، تو بھارتی خواتین اندھیری گلی میں کسی مرد کے مقابلے میں بھوت کا سامنا کرنا زیادہ محفوظ سمجھیں گی‘۔
ٹوئنکل کھنہ کا کہنا ہے کہ جب تک بھارتی معاشرہ مردوں کی سوچ میں تبدیلی نہیں لاتا، تب تک عورتیں محفوظ نہیں ہوسکتیں۔ بھارتی عورتوں کے لیے مردوں کا خوف بھوتوں کے خوف سے زیادہ حقیقی ہے۔
