امرتسر(باغی ٹی وی)بھارتی فوجی تنصیبات کی تصاویر اور خفیہ معلومات پاکستان کو فراہم کرنے کے الزام میں دو عیسائی گرفتار
بھارتی پنجاب پولیس کے ڈائریکٹر جنرل (DGP Punjab Police) کی جانب سے 3 مئی 2025 کو ایکس (سابق ٹویٹر) پر جاری بیان میں انکشاف کیا گیا ہے کہ امرتسر رورل پولیس نے ایک بڑی جوابی جاسوسی کارروائی کے دوران دو افراد پلک شیر مسیح اور سورج مسیح کو گرفتار کر لیا ہے۔ گرفتار افراد پر الزام ہے کہ انہوں نے امرتسر میں واقع فوجی چھاؤنیوں اور فضائی اڈوں کی حساس تصاویر اور معلومات افشاء کر کے قومی سلامتی کو خطرے میں ڈالا۔
ابتدائی تحقیقات میں یہ بات سامنے آئی ہے کہ دونوں ملزمان کے تعلقات پاکستانی انٹیلیجنس نیٹ ورک سے تھے جو امرتسر سینٹرل جیل میں قید ہربھجیت سنگھ عرف پِٹو عرف ہیپی کے ذریعے استوار کیے گئے۔ ہربھجیت سنگھ کو پہلے ہی حساس نوعیت کے مقدمات میں گرفتار کیا جا چکا ہے۔
https://x.com/dgppunjabpolice/status/1918885878522351901?s=46
پولیس نے اس کارروائی کے بعد Official Secrets Act کے تحت مقدمہ درج کر کے تفتیش کا دائرہ مزید وسیع کر دیا ہے اور امکان ظاہر کیا جا رہا ہے کہ آئندہ دنوں میں مزید اہم اور حساس انکشافات سامنے آئیں گے۔
بھارتی پنجاب پولیس کے مطابق وہ بھارتی افواج کے شانہ بشانہ کھڑی ہے اور قومی سلامتی سے کھیلنے کی کسی بھی کوشش کا فوری اور سختی سے نوٹس لیا جائے گا۔ پولیس نے واضح کیا ہے کہ ملک کی مسلح افواج کے تحفظ کو کمزور کرنے کی ہر سازش کو ناکام بنایا جائے گا۔
