ایشیا کپ 2025 میں پاکستان نے یو اے ای کو 41 رنز سے شکست دے کر سپر فور مرحلے کے لیے کوالیفائی کر لیا ہے، اگلے مرحلے میں رسائی کے ساتھ ہی ٹیم کا ایک بار پھر روایتی حریف بھارت سے بھی میچ شیڈول ہو گیا ہے۔
دبئی انٹرنیشنل کرکٹ اسٹیڈیم میں کھیلے گئے میچ میں یو اے ای کی ٹیم پاکستان کے 147 رنز کے ہدف کے تعاقب میں 105 رنز بنا کر آل آؤٹ ہوگئی، حریف ٹیم کے راہول چوپڑا 35 اور دورو پراشار 20 رنز بنا کر نمایاں رہے۔اسپنر ابرار احمد، حارث رؤف اور شاہین شاہ آفریدی نے 2،2 وکٹیں اپنے نام کیں، صائم ایوب اور سلمان علی آغا نے ایک، ایک وکٹ حاصل کی۔
میچ میں پاکستان کا ٹاپ آرڈر ایک بار پھر ناکام رہا، تاہم فخر زمان کی شاندار ففٹی اور شاہین شاہ آفریدی کے برق رفتار 29 رنز ناٹ آؤٹ اننگز کی بدولت پاکستان ٹیم 8 وکٹوں کے نقصان پر 146 رنز بنانے میں کامیاب رہی۔اوپنر بیٹر فخر زمان نے 36 گیندوں پر 50 رنز کی شاندار اننگز کھیلی، انہوں نے 2 چوکے اور 3 چھکے بھی لگائے، شاہین شاہ آفریدی نے ایک بار پھر پاکستانی کی بیٹنگ لائن کو سہارا دیا اور مشکل وقت میں 14 گیندوں پر 3 چوکوں اور 2 چھکوں کی مدد سے 29 رنز کی عمدہ اننگز کھیلی۔
مڈل آرڈر بلے باز حسن نواز صرف 3 اور خوشدل شاہ اور محمد نواز4،4 رنز ہی بنا سکے، محمد حارث 14 گیندوں پر 18 رنز بنا کر جنید صدیق کے ہاتھوں بولڈ ہوئے۔یو اے ای کے جنید صدیق نے صرف 18 رنز کے عوض 4 وکٹیں اپنے نام کیں جب کہ سمرنجیت سنگھ 3 وکٹیں حاصل کرنے میں کامیاب رہے۔
ایشیا کپ کے 10ویں میچ میں متحدہ عرب امارات (یو اے ای) نے ٹاس جیت کرپاکستان کے خلاف فیلڈنگ کرنے کا فیصلہ کیا ہے۔
ایشیا کپ میں دبئی انٹرنیشنل کرکٹ اسٹیڈیم میں کھیلے جانے والا میچ ایک گھنٹے کی تاخیر سے شروع ہوا، پاکستان کرکٹ بورڈ (پی سی بی) کی جانب سے میچ ریفری کو ہٹانے اور انٹرنیشنل کرکٹ کونسل (آئی سی سی) کے ساتھ مذاکرات کے باعث میچ میں تاخیر ہوئی۔ٹاس کے بعد پاکستان کرکٹ ٹیم کے کپتان کا کہنا تھا کہ سچ پوچھیں تو پہلے بیٹنگ کرنا چاہتے تھے، ہمارے لیے یہ ایک بہترین کھیلنے کا دن ہے، اس کی وجہ یہ نہیں ہے کہ (متحدہ عرب امارات) کمزور حریف ہے بلکہ ہماری توجہ اپنے منصوبوں کو عملی جامہ پہنانا ہے۔
انہوں نے کہا کہ ٹیم میں دو تبدیلیاں کی ہیں، سفیان مقیم اور فہیم اشرف آج میچ نہیں کھیل رہے۔
بنکاک ائیرپورٹ،پاکستانی شہری پر چینی خاتون کو چھونے کا الزام
