متحدہ عرب امارات میں حکام نے 5 خواتین سمیت 10 پاکستانیوں کو بھیک مانگتے ہوئے گرفتار کر لیا
متحدہ عرب امارات (یو اے ای) میں حکام نے پاکستان سے تعلق رکھنے والے 10 افراد کو بھیک مانگتے ہوئے گرفتار کر لیا ہے۔ ان میں پانچ خواتین بھی شامل ہیں۔ اس گرفتاری کے بعد یو اے ای حکام نے پاکستانی حکام کو آگاہ کر دیا ہے، اور اس حوالے سے مزید کارروائی کی تیاری کی جا رہی ہے۔، وفاقی تحقیقاتی ادارے (ایف آئی اے) کے ذرائع نے بتایا کہ پنجاب کے ضلع وہاڑی سے تعلق رکھنے والی تین خواتین، آمنہ بی بی، کوثر بی بی اور فرزانہ بی بی، جبکہ لاہور سے جمیلہ بی بی اور زبیدہ بی بی کو متحدہ عرب امارات میں مختلف کارروائیوں کے دوران بھیک مانگتے ہوئے پکڑا گیا۔ ان خواتین کو گرفتار کر کے جیل بھیج دیا گیا ہے اور ان کی پاکستان واپسی کی تیاری کی جا رہی ہے۔
اسی طرح، جنوبی پنجاب اور خیبرپختونخوا سے تعلق رکھنے والے مزید افراد کو بھی گرفتار کیا گیا ہے۔ ان میں ڈی جی خان کے رہائشی محمد زکریا، بہاول نگر کے وسیم حیدر، لاہور کے محمد عثمان، چار سدہ کے اعجاز خان اور پشاور کے عبداللہ شامل ہیں۔ حکام کے مطابق ان افراد کو بھی بھیک مانگتے ہوئے گرفتار کیا گیا۔ جب یہ افراد پاکستان پہنچیں گے تو انہیں گرفتار کر کے قانون کے مطابق کارروائی کی جائے گی۔یہ گرفتاریوں کی کارروائی یو اے ای حکام کی طرف سے بھیک مانگنے کی روک تھام کے لیے کی گئی تھی، جس میں پاکستانیوں کے اس غیر قانونی عمل کے خلاف سخت اقدامات کیے جا رہے ہیں۔
