اوچ شریف (باغی ٹی وی نامہ نگار حبیب خان)نواحی علاقے اوچموغلہ عباسیہ روڈ پر موٹر سائیکل سوار آوارہ کتے سے ٹکرا کر شدید زخمی ہوگیا۔

تفصیلات کے مطابق محمد معظم ولد محمود خان اپنی موٹر سائیکل پر سفر کر رہے تھے کہ اچانک ایک آوارہ کتا ان کی موٹر سائیکل سے ٹکرا گیا۔ حادثے میں وہ زمین پر گر کر شدید زخمی ہوگئے، ان کی پیشانی اور دائیں گھٹنے پر گہرے زخم آئے۔ ریسکیو ٹیم نے موقع پر پہنچ کر ابتدائی طبی امداد فراہم کی اور انہیں رورل ہیلتھ سنٹر (RHC) اوچ شریف منتقل کر دیا۔

حادثے پر شہریوں نے شدید تشویش کا اظہار کرتے ہوئے میونسپل کمیٹی اور مقامی انتظامیہ کو آوارہ کتوں کی تلفی میں ناکامی کا ذمہ دار ٹھہرایا۔ شہریوں محمد عامر، محمد آصف، محمد عابد، علی حسین، زین خان اور دیگر نے میڈیا سے گفتگو کرتے ہوئے کہا کہ سڑکوں پر آوارہ کتوں کی موجودگی کے باعث حادثات معمول بن چکے ہیں، جس سے شہریوں کو سنگین خطرات لاحق ہیں۔

شہریوں نے متعلقہ حکام سے اپیل کی ہے کہ فوری طور پر سڑکوں سے آوارہ کتوں کو ہٹانے کے لیے مؤثر اقدامات کیے جائیں تاکہ مستقبل میں اس قسم کے حادثات سے بچا جا سکے۔

Shares: