اوچ شریف: غیر معیاری دودھ کی فروخت پر کارروائی، دکان سیل

اوچ شریف (نامہ نگارحبیب خان) حسینی چوک اور حکیم محمد قاسم کی گلی میں پرائس کنٹرول مجسٹریٹ عمران حیدر سیال نے غیر معیاری دودھ کی فروخت کے خلاف کارروائی کرتے ہوئے سرفراز اور ہاشم لودھرا کی دودھ کی دکان پر چھاپہ مارا۔ کارروائی کے دوران دودھ سے کریم نکالنے کا عمل جاری تھا، جسے فوری طور پر روک کر دکان سیل کر دی گئی جبکہ غیر معیاری دودھ ضائع کر دیا گیا۔

عمران حیدر سیال نے کہا کہ عوام کی صحت کے تحفظ کے لیے غیر قانونی سرگرمیاں کسی صورت برداشت نہیں کی جائیں گی۔ شہریوں نے اس اقدام کو سراہتے ہوئے اسے عوامی صحت کے لیے ایک اہم قدم قرار دیا۔ انتظامیہ نے دودھ کے معیار کی سخت نگرانی کا یقین دلایا اور دکانداروں کو تنبیہ کی کہ دودھ میں کسی قسم کی ملاوٹ سے باز رہیں۔