اوچ شریف: تیز رفتار ہائی ایس کی زد میں آ کر چار سالہ بچہ جاں بحق

اوچ شریف (باغی ٹی وی، نامہ نگار حبیب خان) اوچ شریف قومی شاہراہ پر سپاہی والی ہٹی کے قریب ایک افسوسناک حادثہ پیش آیا، جس میں چار سالہ محمد ایاز نامی بچہ سڑک عبور کرتے ہوئے تیز رفتار ہائی ایس کی زد میں آ کر جاں بحق ہو گیا۔

تفصیل کے مطابق بچہ قومی شاہراہ عبور کر رہا تھا کہ اچانک ایک تیز رفتار ہائی ایس نے اسے ٹکر مار دی۔ اس حادثے میں بچہ شدید زخمی ہو گیا۔ مقامی افراد نے فوراً بچے کو ہسپتال پہنچانے کی کوشش کی تاہم وہ زخموں کی تاب نہ لاتے ہوئے جاں بحق ہو گیا۔

حادثے کی اطلاع ملتے ہی محمد ایاز کے والدین پر غشی طاری ہو گئی اور پورے علاقے میں سوگ کی فضا چھا گئی۔ اہل علاقہ اور رشتہ داروں نے اس سانحے پر گہرے رنج و غم کا اظہار کیا ہے۔

حادثے کے بعد مقامی افراد نے تیز رفتار گاڑیوں کی سڑک پر بے ہنگم حرکتوں اور حادثات کے بڑھتے ہوئے واقعات کے خلاف احتجاج کیا۔ انہوں نے حکام سے مطالبہ کیا کہ قومی شاہراہ پر حفاظتی تدابیر کو مزید سخت کیا جائے تاکہ مستقبل میں ایسے واقعات سے بچا جا سکے۔