اوچ شریف (نامہ نگار حبیب خان) میونسپل کمیٹی اوچ شریف کی جانب سے نقشہ اور کمرشل فیسوں کی عدم ادائیگی پر پیف سے الحاق شدہ تعلیمی اداروں اور دیگر نجی سکولوں کو نوٹسز جاری کیے جانے کے بعد، اوچ سول سوسائٹی کے صدر محمد عمر خورشید سہمن کی قیادت میں تعلیمی اداروں کے سربراہان نے چیف آفیسر میونسپل کمیٹی فرخ عدنان سے ملاقات کی۔
ملاقات میں انچارج انفورسمنٹ جام سجاد ابراہیم جھلن، تاجر رہنما چوہدری محمد طارق اور نجی تعلیمی اداروں کے سربراہان ظہیر الدین بابر، زوار حسین بھٹہ، اشتیاق احمد انجم، سرفراز علی خان جتوئی، محمد شکیل سیال، سراج احمد سحر، طارق حسین خان اور سجاد حسین جوئیہ بھی موجود تھے۔
صدر اوچ سول سوسائٹی محمد عمر خورشید سہمن نے چیف آفیسر کو بتایا کہ زیادہ تر پیف سکول اور نجی تعلیمی ادارے کرائے کی عمارتوں میں قائم ہیں اور میونسپلٹی کی جانب سے کمرشل فیسوں اور نقشہ فیسوں کے نوٹسز جاری کیے گئے ہیں۔
انچارج انفورسمنٹ جام سجاد ابراہیم جھلن نے چیف آفیسر کو بریفنگ دیتے ہوئے بتایا کہ جن سکولوں کے نقشے منظور نہیں تھے، انہیں نوٹسز جاری کیے گئے تھے، جس کے خلاف سکول مالکان نے لاہور ہائی کورٹ بہاولپور بینچ میں رٹ پٹیشن دائر کی تھی، جو 24 فروری 2025 کو خارج کر دی گئی۔ اس لیے، نقشہ منظوری کے لیے دوبارہ نوٹسز جاری کیے گئے ہیں۔
چیف آفیسر فرخ عدنان نے انچارج انفورسمنٹ کو ہدایت کی کہ قانون اور میرٹ کو مدنظر رکھتے ہوئے نجی سکول مالکان کے مسائل حل کیے جائیں۔
