ڈاکٹرغلام مصطفی بڈانی
اوچ شریف (باغی ٹی وی، نامہ نگار حبیب خان) ڈسٹرکٹ پولیس آفیسر بہاولپور محمد حسن اقبال کی ہدایات پر تھانہ سٹی احمد پور شرقیہ کی ٹیم نے پکار 15 پر جھوٹی اطلاع دینے والے شخص کو ساتھیوں سمیت گرفتار کر لیا۔ ڈی پی او کی ہدایت پر جھوٹے مقدمات درج کروانے والوں کے خلاف بلاامتیاز کارروائیاں جاری ہیں، ایس ڈی پی او احمد پور شرقیہ نے پریس کانفرنس میں بتایا۔
چند روز قبل محمد ارسلان یعقوب نے پکار 15 پر اطلاع دی کہ وہ اپنی بیوی صباء بی بی اور تین سالہ بیٹے کے ساتھ موٹر سائیکل پر ڈیرہ مستی جا رہے تھے کہ عباسیہ چوک پر سفید کار سوار نامعلوم افراد نے ان کی بیوی اور بیٹے کو اغوا کر لیا۔
پولیس نے فوری مقدمہ درج کر کے کارروائی کا آغاز کیا، تاہم ابتدائی تفتیش میں وقوعہ مشکوک پایا گیا۔ مدعی کو شاملِ تفتیش کر کے اس کا کریمنل ریکارڈ چیک کیا گیا تو معلوم ہوا کہ وہ ماضی میں بھی جھوٹے مقدمات درج کروانے کا عادی رہا ہے۔
مزید تحقیق کے بعد انکشاف ہوا کہ اغوا کا یہ ڈرامہ خود محمد ارسلان نے اپنے دوستوں ریحان ریاض، وقاص اکرم اور اپنی بیوی صباء بی بی کے ساتھ مل کر رچایا تھا۔ پولیس نے فوری کارروائی کرتے ہوئے بیوی اور بیٹے کو ان کے سسرال سے بازیاب کرا لیا جبکہ ملزم ریحان ریاض کے قبضے سے وقوعہ میں استعمال ہونے والی آلٹو کار بھی برآمد کر لی گئی۔
پولیس نے ملزمان کے خلاف اینٹی ریپ ایکٹ سمیت دیگر دفعات کے تحت مقدمہ درج کر کے انہیں جیل منتقل کر دیا۔ ایس ڈی پی او نے کہا کہ پکار 15 پر جھوٹی اطلاع دینا سنگین جرم ہے اور ایسے عناصر کے خلاف سخت قانونی کارروائی کی جائے گی۔
