احمد پور شرقیہ: ہمسایوں کی زیادتیوں سے بزرگ اخبار فروش اور بیٹی کی زندگی اجیرن
اوچ شریف (باغی ٹی وی ،نامہ نگارحبیب خان )احمد پور شرقیہ میں ہمسایوں کی زیادتیوں سے بزرگ اخبار فروش اور بیٹی کی زندگی اجیرن
تفصیل کے مطابق احمدپور شرقیہ میں چالیس سال سے عوام کی بے لوث خدمت کرنے والے بزرگ اخبار فروش حسین علی اور ان کی حافظہ عالمہ بیٹی شدید مشکلات کا سامنا کر رہے ہیں۔ ملحقہ ہمسایوں کی جانب سے آئے دن تنگی اور چادر چار دیواری کی پامالی کے باعث وہ انصاف کے لئے در در کی ٹھوکریں کھا رہے ہیں۔
حسین علی نے پریس کانفرنس میں بتایا کہ انہوں نے السعودیہ پمپ کے پیچھے کالونی میں پلاٹ خرید کر مکان بنایا ہے جہاں وہ اپنی بیٹی اور ذہنی طور پر مفلوج بیٹے کے ساتھ رہائش پذیر ہیں۔ تاہم ہمسایوں کی جانب سے ان کی زندگی اجیرن بنا دی گئی ہے۔ جب پولیس ہیلپ لائن پر کال کی جاتی ہے تو وہ کوئی کارروائی کیے بغیر واپس چلی جاتی ہے اور کہتی ہے کہ سماجی شخصیت کرن زاہد انصاری نے معاملہ حل کرنے کی یقین دہانی کرائی ہے۔
حسین علی نے بتایا کہ گزشتہ روز ان کے گھر کا دروازہ کھٹکا کر مرد و خواتین نے انہیں اور ان کی بیٹی کو تھپڑ اور مکوں کے ساتھ جان سے مارنے کی دھمکیاں دیں، جس کے نتیجے میں ان کی بیٹی کے دونوں بازو چھلنی ہو گئے۔ دونوں طرف سے پولیس کو مدد کے لئے کال کی گئی لیکن کرن زاہد انصاری کی مداخلت پر پولیس نے کوئی کارروائی نہیں کی۔
بزرگ اخبار فروش حسین علی نے وزیر اعلی پنجاب، آئی جی پنجاب اور ڈسٹرکٹ پولیس آفیسر بہاول پور اسد سرفراز سے نوٹس لینے کی اپیل کی ہے اور اخبار نویسوں سے درخواست کی ہے کہ ان کی آواز ایوانوں تک پہنچائیں تاکہ وہ سکون سے اپنی باقی زندگی گزار سکیں۔
