اوچ شریف: بکھری چوک پر خوفناک حادثہ، خاتون جاں بحق، دو افراد زخمی
اوچ شریف،باغی ٹی وی (نامہ نگارحبیب خان )نواحی علاقے بکھری چوک پر موٹر سائیکل اور کار میں خوفناک تصادم، ایک خاتون جاں بحق جبکہ دو افراد شدید زخمی ہو گئے۔
تفصیلات کے مطابق رتہر نہڑانوالی بستی عبد اللہ خان کے رہائشی محمد یوسف اپنی اہلیہ اور ایک خاتون کے ہمراہ بینظیر انکم سپورٹ پروگرام سے رقم وصول کر کے گھر واپس جا رہے تھے کہ بکھری چوک کے قریب ان کی موٹر سائیکل کو ایک نامعلوم کار نے ٹکر مار دی۔ حادثے میں محمد یوسف، ان کی اہلیہ اور دوسری خاتون شدید زخمی ہو گئے۔
زخمیوں کو فوری طور پر مقامی ہسپتال منتقل کیا گیا، جہاں محمد یوسف کی اہلیہ زخموں کی تاب نہ لاتے ہوئے دم توڑ گئیں۔ حادثے کے بعد کار ڈرائیور گاڑی سمیت موقع سے فرار ہو گیا۔ پولیس نے واقعے کی تحقیقات شروع کر دی ہیں۔
