اوچ شریف (باغی ٹی وی، نامہ نگار حبیب خان)ملک بھر میں "جرنلسٹ پروٹیکشن بل” کی منظوری کو آزادیٔ صحافت کی بڑی فتح قرار دیا جا رہا ہے، جبکہ پریس کلب اوچ شریف کے عہدیداران نے بل کی منظوری پر زبردست خوشی اور اطمینان کا اظہار کرتے ہوئے اسے صحافیوں کے لیے ایک تاریخی لمحہ قرار دیا۔
پریس کلب اوچ شریف کے صدر میاں محمد عامر صدیقی نے کہا کہ "یہ قانون صحافیوں کے لیے ایک نیا عہد لے کر آیا ہے۔ اب ہم بغیر خوف و دباؤ کے عوام کی آواز بن سکیں گے۔ حکومت کا یہ قدم لائقِ تحسین ہے، تاہم اس پر مؤثر عملدرآمد بھی ناگزیر ہے۔”
جنرل سیکرٹری حبیب خان نے کہا، "ہم برسوں سے جس تحفظاتی قانون کے منتظر تھے، آج وہ خواب حقیقت بن گیا ہے۔ اب صحافیوں سے زیادتی کرنے والا قانون کے شکنجے سے نہیں بچ سکے گا۔”
چیئرمین خواجہ غلام شبیر نے بل کو آزادیٔ اظہار اور جمہوری قدروں کی جیت قرار دیا، جبکہ چیئرمین ایکشن کمیٹی ساجد خان نے کہا کہ "صحافت کوئی جرم نہیں، اور اب قانون بھی ہمارے ساتھ کھڑا ہے۔ یہ بل ہمارے تحفظ، وقار اور اعتماد کی علامت ہے۔”
پریس کلب کے دیگر عہدیداران شفیق انجم، خواجہ سہیل عباس، ساجد بنوں، ثاقب منظور، حسیب واحد خان، قاری سمیع اللہ فاروقی، محمد اسماعیل خان، مزمل وارن، سلیمان وارن اور باسط علی خان سمیت دیگر ممبران نے مشترکہ بیان میں کہا کہ "یہ قانون آزادیٔ صحافت کا سنگِ میل ہے اور ہم حکومت سے مطالبہ کرتے ہیں کہ اس پر مکمل اور شفاف عملدرآمد کو یقینی بنایا جائے تاکہ صحافی برادری کو حقیقی ریلیف حاصل ہو سکے۔”
پریس کلب اوچ شریف کے تمام اراکین نے اس قانون کو صحافیوں کی طویل جدوجہد کا ثمر قرار دیا اور امید ظاہر کی کہ یہ قانون صرف وفاقی سطح تک محدود نہیں رہے گا بلکہ ہر ضلع اور تحصیل کی سطح پر اس پر عملدرآمد یقینی بنایا جائے گا
