اوچ شریف (باغی ٹی وی نامہ نگارحبیب خان) عالمی مجلس تحفظ ختم نبوت اور جمعیت علماء اسلام کے زیر اہتمام موضع رسول پور میں تحفظ ختم نبوت کانفرنس کا کامیاب انعقاد ہوا۔ اس اہم کانفرنس میں عوام کی کثیر تعداد نے شرکت کی، جن میں علماء، طلباء، اور معاشرے کے مختلف طبقات سے تعلق رکھنے والے افراد شامل تھے۔
کانفرنس میں مختلف نامور علماء کرام نے ختم نبوت کے موضوع پر پراثر اور مدلل خطابات کیے۔ مجاہد ختم نبوت حضرت مولانا محمد اسماعیل شجاع آبادی نے اپنے خطاب میں ختم نبوت کی اہمیت پر روشنی ڈالی اور نوجوانوں کو اس حوالے سے آگاہ کرنے کی ضرورت پر زور دیا۔ شہنشاہ خطابت حضرت مولانا سید ابوبکر شاہ نے ختم نبوت کے پیغام کو معاشرتی فلاح و بہبود کے لیے بنیاد قرار دیا۔
اجتماع کی صدارت حضرت مولانا رشید احمد عباسی نے کی، جنہوں نے اتحاد امت پر زور دیا اور دین کی حفاظت کے لیے اجتماعی کوششوں کی ضرورت پر روشنی ڈالی۔ اس موقع پر شعراء کرام نے بھی نعتیہ کلام پیش کیا، جس سے محفل میں روحانی رنگ بھر گیا۔
شرکاء نے ختم نبوت کے دفاع کے لیے ہر ممکن اقدام کرنے کا عزم کیا اور اس پیغام کو مزید آگے بڑھانے کا عہد کیا۔ کانفرنس میں یہ بات زور دی گئی کہ مسلمانوں کو اپنے عقائد کی حفاظت کے ساتھ ساتھ معاشرتی اتحاد کو بھی فروغ دینا چاہیے۔
یہ اجتماع 32 سال سے جاری ہے اور اس سال بھی لوگوں میں دینی بیداری اور اتحاد کی فضاء پیدا کرنے میں کامیاب رہا۔
