اوچ شریف،باغی ٹی وی (نامہ نگارحبیب خان) شہر کی مصروف سڑکوں پر اسپیڈ بریکرز کی عدم موجودگی کے باعث حادثات میں خطرناک حد تک اضافہ ہو گیا ہے، جس سے قیمتی جانوں کا ضیاع ہو رہا ہے۔ شہریوں نے انتظامیہ سے فوری نوٹس لینے اور حفاظتی اقدامات کرنے کا مطالبہ کیا ہے۔
اوچ شریف کی اہم شاہراہوں، خصوصاً علی پور روڈ، خیر پور ڈاہا روڈ اور احمد پور شرقیہ روڈ پر اسپیڈ بریکرز نہ ہونے کے باعث تیز رفتار گاڑیاں اور موٹر سائیکل سوار شہریوں کی زندگیوں کو خطرے میں ڈال رہے ہیں۔ تعلیمی اداروں، تجارتی مراکز اور رہائشی علاقوں میں بھی اسپیڈ بریکرز کی کمی کے سبب حادثات معمول بن چکے ہیں۔
گزشتہ دنوں اوچ گیلانی کے رہائشی رفیق حسین تیز رفتار گاڑی کی زد میں آ کر جان سے ہاتھ دھو بیٹھے۔ حادثہ مخدوم سید علی گیلانی شہید چوک پر پیش آیا، جہاں گاڑی بے قابو ہو کر انہیں کچلتی ہوئی گزر گئی اور ڈرائیور موقع سے فرار ہو گیا۔ ابتدائی تحقیقات میں اس حادثے کی وجہ تیز رفتاری اور اسپیڈ بریکرز کی عدم موجودگی کو قرار دیا گیا ہے۔
مقامی افراد محمد علی، محمد مکی، ادریس احمد، شہزاد احمد، باسط علی، سرفراز احمد اور دیگر شہریوں نے اس صورتحال پر شدید تشویش کا اظہار کیا ہے۔ ان کا کہنا ہے کہ انتظامیہ کی غفلت کے باعث شہریوں کی زندگیاں داؤ پر لگی ہوئی ہیں۔ انہوں نے ضلعی انتظامیہ اور متعلقہ حکام سے مطالبہ کیا کہ فوری طور پر سڑکوں پر اسپیڈ بریکرز تعمیر کیے جائیں تاکہ مزید جانوں کا ضیاع روکا جا سکے۔
شہریوں نے کہا کہ اگر بروقت اسپیڈ بریکرز نہ بنائے گئے تو مزید حادثات رونما ہو سکتے ہیں، جس کی تمام تر ذمہ داری متعلقہ اداروں پر ہوگی۔ کیا انتظامیہ شہریوں کے تحفظ کے لیے عملی اقدامات کرے گی، یا پھر یہ مسئلہ بھی فائلوں میں دب کر رہ جائے گا؟
