ڈاکٹرغلام مصطفی بڈانی
اوچ شریف (باغی ٹی وی، نامہ نگار حبیب خان) اوچ شریف میں محلہ شمیم آباد میں دن دہاڑے مسلح ڈاکو گھر میں گھس آئے، اہلِ خانہ کو اسلحے کے زور پر یرغمال بنایا، زیورات لوٹے، خاتون کو زخمی کیا اور 12 سالہ بچی کو اغوا کرکے فرار ہو گئے۔ واقعے نے شہر میں خوف و ہراس پھیلا دیا، جب کہ پولیس حسبِ روایت تاخیر سے پہنچی اور اب تک کوئی گرفتاری عمل میں نہیں آ سکی۔
متاثرہ خاتون سلمیٰ زوجہ غلام شبیر عمر تقریباً 33 سال اپنی بچی کو بچانے کی کوشش میں زخمی ہو گئیں۔ ڈاکو ان کے کانوں سے بالیاں نوچ کر لے گئے جس سے بائیں کان کی لو شدید زخمی ہو گئی۔ اہلِ محلہ کے مطابق خاتون کی چیخ و پکار سن کر علاقہ لرز اٹھا لیکن پولیس اور ایس ایچ او موقع پر تاخیر سے پہنچے اور ڈاکو بچی سمیت فرار ہو چکے تھے۔
زخمی خاتون کو ریسکیو اہلکاروں نے ابتدائی طبی امداد فراہم کی، تاہم اغوا شدہ بچی کا کوئی سراغ نہ لگایا جا سکا۔ شہریوں نے بڑھتے ہوئے جرائم پر شدید غم و غصے کا اظہار کرتے ہوئے وزیراعلیٰ پنجاب، آئی جی پولیس اور دیگر اعلیٰ حکام سے فوری نوٹس لینے اور بچی کی بازیابی کا مطالبہ کیا ہے۔
عوام کا کہنا ہے کہ اوچ شریف میں ڈاکو راج قائم ہو چکا ہے اور پولیس جرائم کنٹرول کرنے میں مکمل طور پر ناکام ہو چکی ہے۔ عوام نے مطالبہ کیا کہ پولیس کی کارکردگی کا ازسرِ نو جائزہ لیا جائے اور شہریوں کو تحفظ فراہم کیا جائے۔
