اوچ شریف( باغی ٹی،نامہ نگارحبیب خان) اوچ شریف اور اس کے گرد و نواح میں چنگ چی رکشوں اور لوڈر گاڑیوں کے ڈرائیوروں کی لالچ نے شہریوں کی زندگیوں کو شدید خطرے میں ڈال دیا ہے۔ زیادہ منافع کمانے کی ہوس میں ڈرائیور مسافروں کو غیر محفوظ طریقے سے گاڑیوں میں سوار کر رہے ہیں جس کی وجہ سے سڑکوں پر حادثات کا خطرہ بڑھ گیا ہے۔
چنگ چی رکشوں میں جگہ کی کمی کی وجہ سے ڈرائیور مسافروں کو نہ صرف اندر بلکہ گاڑی کی چھتوں اور سائیڈوں پر بھی بیٹھنے پر مجبور کر رہے ہیں۔ یہ انتہائی غیر ذمہ دارانہ رویہ مسافروں کی جانوں کو خطرے میں ڈال رہا ہے۔
شہریوں نے اس صورتحال پر شدید تشویش کا اظہار کرتے ہوئے متعلقہ حکام سے فوری کارروائی کا مطالبہ کیا ہے۔ شہریوں کا کہنا ہے کہ عوامی نقل و حمل کے نظام میں بہتری لانے اور محفوظ سفر کو یقینی بنانے کے لیے سخت اقدامات کی ضرورت ہے۔ اگر اس مسئلے کا حل نہ نکالا گیا تو مستقبل میں بڑے حادثات کے امکانات بڑھ سکتے ہیں۔
