اوچ شریف باغی ٹی وی (نامہ نگار حبیب خان) ڈپٹی کمشنر بہاولپور اور اسسٹنٹ کمشنر احمد پور شرقیہ کی خصوصی ہدایات پر پرائس کنٹرول مجسٹریٹ عمران حیدر سیال نے علی الصبح فروٹ اینڈ ویجیٹیبل مارکیٹ احمد پور شرقیہ کا اچانک دورہ کیا۔ اس دورے کا بنیادی مقصد اشیائے خوردونوش کی قیمتوں کو قابو میں رکھنا اور نیلامی کے عمل کو شفاف بنانا تھا۔
اپنے دورے کے دوران پرائس کنٹرول مجسٹریٹ عمران حیدر سیال نے ٹماٹر، آلو، پیاز سمیت دیگر سبزیوں اور پھلوں کی نیلامی کے طریقہ کار کا باریک بینی سے جائزہ لیا۔ انہوں نے نیلامی میں شامل آڑھتیوں اور تاجروں سے بات چیت کی اور انہیں سرکاری نرخ ناموں کی سختی سے پابندی کرنے کی ہدایت کی۔
عمران حیدر سیال نے سبزی منڈی کے مختلف حصوں کا تفصیلی معائنہ کیا اور وہاں موجود اشیاء کے معیار اور قیمتوں کا جائزہ لیا۔ انہوں نے واضح طور پر کہا کہ کسی بھی صورت میں ناجائز منافع خوری برداشت نہیں کی جائے گی اور مقرر کردہ قیمتوں سے زیادہ وصول کرنے والوں کے خلاف سخت قانونی کارروائی عمل میں لائی جائے گی۔ انہوں نے خبردار کیا کہ نرخ نامے کی خلاف ورزی کرنے والوں پر بھاری جرمانے عائد کیے جائیں گے اور ضرورت پڑنے پر دیگر قانونی اقدامات بھی اٹھائے جائیں گے۔
انہوں نے مارکیٹ کمیٹی کے عملے کو بھی ہدایت کی کہ وہ روزانہ کی بنیاد پر نیلامی کے عمل کی شفافیت کو یقینی بنائیں اور عوام کو ریلیف پہنچانے کے لیے اپنی ذمہ داریاں پوری ایمانداری کے ساتھ نبھائیں۔
شہریوں نے پرائس کنٹرول مجسٹریٹ کے اس اقدام کو خوب سراہا اور امید ظاہر کی کہ اس طرح کے مسلسل اقدامات سے مہنگائی پر قابو پانے میں مدد ملے گی اور عام لوگوں کو سستی اور معیاری اشیاء دستیاب ہو سکیں گی۔
