اوچ شریف (باغی ٹی وی، نامہ نگار حبیب خان) قبرستان حضرت صفی الدین حقانی کی مین دیوار شدید خستہ حالی کا شکار ہو چکی ہے اور کسی بھی وقت گر سکتی ہے۔ اس صورتحال نے شہریوں میں خوف و ہراس پھیلا دیا ہے اور ارباب اختیار کی غفلت پر سوالات اٹھا دیے ہیں۔
تفصیلات کے مطابق حضرت صفی الدین حقانی کے دربار سے ملحقہ قبرستان کی مین دیوار زمین کی سطح سے چند فٹ اونچی ہے اور خستہ حالی کی وجہ سے کسی بھی وقت زمین بوس ہو سکتی ہے۔ یہ قبرستان محلہ خواجگان کی ایک مصروف گلی میں واقع ہے، جہاں سے روزانہ سیکڑوں طلبہ، طالبات اور شہری گزرتے ہیں۔
مقامی افراد کے مطابق اگر یہ دیوار گر گئی تو کسی بڑے جانی نقصان کا اندیشہ ہے۔ اہل علاقہ کا کہنا ہے کہ انہوں نے کئی بار متعلقہ حکام کو اس سنگین صورتحال کی جانب متوجہ کرنے کی کوشش کی تاہم ابھی تک کوئی عملی اقدام نہیں اٹھایا گیا۔
شہریوں کا کہنا ہے کہ یہ دیوار کسی بھی وقت زمین بوس ہو سکتی ہے، جس سے نہ صرف پیدل چلنے والے افراد کی جانوں کو خطرہ لاحق ہے بلکہ آس پاس کی عمارتوں کو بھی نقصان پہنچ سکتا ہے۔ انہوں نے ارباب اختیار سے فوری طور پر نوٹس لینے اور دیوار کی مرمت یا تعمیر نو کا کام شروع کرنے کا مطالبہ کیا ہے۔
شہریوں نے ارباب اختیار کی غفلت پر شدید تنقید کرتے ہوئے کہا کہ اگر خدانخواستہ کوئی حادثہ پیش آ گیا تو اس کے ذمہ دار حکام ہوں گے۔ انہوں نے مطالبہ کیا کہ جلد از جلد اس مسئلے کا حل نکالا جائے تاکہ کسی بھی ناخوشگوار واقعے سے بچا جا سکے۔
