اوچ شریف،باغی ٹی وی(نامہ نگار حبیب خان) نیا سال 2025 عوام کے لیے نئی مہنگائی لے کر آیا ہے کیونکہ حکومت نے پٹرول و ڈیزل کی قیمتوں میں مزید اضافہ کر دیا ہے، جس سے عوام کی پریشانی میں اضافہ ہو گیا ہے۔ پٹرولیم مصنوعات کی قیمتوں میں اضافہ نے عوام کی توقعات کو ٹوٹتے ہوئے دیکھنے پر مجبور کر دیا ہے۔
نئے سال کے آغاز پر عوام نے امید کی تھی کہ پٹرول و ڈیزل کی قیمتوں میں کمی کی جائے گی، تاکہ مہنگائی کے بوجھ میں کمی ہو سکے، مگر حکومت کے حالیہ فیصلے نے ان تمام امیدوں کو چکناچور کر دیا۔ اوچ شریف کے شہریوں کا کہنا ہے کہ پٹرول و ڈیزل کی قیمتوں میں اضافہ ان کے لیے نیا سال خوشی کا نہیں بلکہ مشکلات کا آغاز ثابت ہوا ہے۔
"مہنگائی پہلے ہی بہت زیادہ ہے، اور اب پٹرول و ڈیزل کی قیمتوں میں اضافے سے ہمارا روزگار اور زندگی کے دوسرے اخراجات مزید مشکل ہو گئے ہیں۔” شہریوں کا کہنا ہے کہ حکومت کی جانب سے یہ اضافہ ان کی پریشانیوں میں مزید اضافہ کرے گا اور اس فیصلے سے ان کی روزمرہ کی زندگی مزید متاثر ہو گی۔
شہریوں نے حکومت سے فوری طور پر اس فیصلے پر نظرثانی کرنے کی اپیل کی ہے تاکہ عوام کو ریلیف مل سکے اور مہنگائی کا بوجھ کم ہو۔
