اوچ شریف (باغی ٹی وی نامہ نگار حبیب خان) اوچ شریف چوک بھٹہ روڈ پر حسن دریا دربار کے قریب ایک دلخراش حادثہ پیش آیا، جہاں ایک تیز رفتار ٹرک نے موٹر سائیکل سواروں کو ٹکر مار دی۔ اس افسوسناک واقعے میں دو افراد موقع پر ہی جاں بحق ہو گئے جبکہ ایک شخص زخمی ہوا۔
جاں بحق ہونے والوں کی شناخت نصر اللہ اور محمد فہد کے نام سے ہوئی ہے، جن کا تعلق جلال پور پیر والا سے تھا۔ ریسکیو ٹیموں نے فوری طور پر موقع پر پہنچ کر جاں بحق افراد کی لاشوں کو ہسپتال منتقل کیا۔ ریسکیو حکام کے مطابق، حادثہ تیز رفتار ٹرک کے کراسنگ کے دوران پیش آیا۔
حادثے کا شکار ہونے والے تینوں افراد موٹر سائیکل پر سوار تھے۔ ٹرک کی ٹکر اتنی شدید تھی کہ دو افراد موقع پر ہی دم توڑ گئے۔ پولیس نے ٹرک کو تحویل میں لے لیا ہے، تاہم ٹرک کا ڈرائیور موقع سے فرار ہونے میں کامیاب ہو گیا۔ پولیس فرار ڈرائیور کی تلاش میں مصروف ہے۔
