اوچ شریف (باغی ٹی وی،نامہ نگارحبیب خان) استاد قمر عباس خان کی ریٹائرمنٹ پر پروقار الوداعی تقریب
تفصیل کے مطابق گورنمنٹ پرائمری اسکول مانک نوشہرہ، مرکز خرم پور کے ٹیچر قمر عباس خان مدتِ ملازمت مکمل ہونے پر ریٹائرڈ ہو گئے۔ ان کے اعزاز میں اسکول میں ایک پروقار الوداعی تقریب کا انعقاد کیا گیا، جس میں اساتذہ، طلبہ، والدین اور اسکول کونسل کے اراکین سمیت بڑی تعداد میں لوگ شریک ہوئے۔
تقریب کے مہمانانِ خصوصی اے ای او مرکز خرم پور محمد صادق بھٹی اور صدر بہاول پور ٹیچرز ایسوسی ایشن تحصیل احمد پور شرقیہ، اللہ ڈتہ سعیدی تھے۔ خطاب کرتے ہوئے محمد صادق بھٹی نے کہا کہ استاد قوم کا معمار ہوتا ہے، اور جو قومیں اساتذہ کا احترام کرتی ہیں وہ ترقی کی منازل طے کرتی ہیں۔ انہوں نے قمر عباس خان کی خدمات کو سراہتے ہوئے کہا کہ ان کی محنت نے ہزاروں طلبہ کا مستقبل سنوارا ہے، اور آج ان کے شاگرد نہ صرف اوچ شریف بلکہ ملک بھر میں مختلف شعبوں میں ملک کا نام روشن کر رہے ہیں۔
تقریب میں اہلِ علاقہ اور طلبہ نے قمر عباس خان کے لیے محبت اور عزت کا اظہار کیا اور انہیں شاندار انداز میں رخصت کیا۔ اس موقع پر ان کی علمی خدمات کو خراجِ تحسین پیش کیا گیا اور حاضرین نے ان کی یادگار خدمات کو سراہا۔
