اوچ شریف: ڈیرہ شیخ حمید اللہ قومی شاہراہ پر ڈکیتی، ملزمان فرار

اوچ شریف (باغی ٹی وی ،نامہ نگارحبیب خان) تھانہ چشریف کی حدود میں واقع ڈیرہ شیخ حمید اللہ قومی شاہراہ پر ڈکیتی کی واردات پیش آئی، جہاں چار نامعلوم مسلح افراد نے ایک شہری سے موٹر سائیکل چھین لیا۔

تفصیلات کے مطابق اوچ شریف کے علاقہ موضع ککس کے رہائشی خادم حسین نے تھانہ اوچ شریف میں شکایت درج کراتے ہوئے بتایا کہ وہ اپنی فصل کماد میں پانی لگانے والے مزدور کو روٹی دینے کے لیے موٹر سائیکل ہنڈا 70/CD پر جا رہا تھا۔ جب وہ قومی شاہراہ پر پہنچا تو اچانک چار مسلح افراد نے اسے گھیر لیا۔ دو ڈاکوؤں کے پاس پسٹل تھے، جنہوں نے اسلحہ کے زور پر موٹر سائیکل چھین لیا اور اسے اسٹارٹ کرنے کی کوشش کی۔

خادم حسین کی جانب سے شور مچانے پر ملزمان خوفزدہ ہو کر موٹر سائیکل چھوڑ کر فرار ہوگئے۔ تھانہ اوچ شریف کی پولیس نے واقعے کی تحقیقات شروع کر دی ہیں، لیکن ابھی تک ملزمان کا کوئی سراغ نہیں مل سکا۔ شہریوں نے فوری کارروائی کا مطالبہ کیا ہے تاکہ علاقے میں سیکیورٹی کی صورتحال کو بہتر بنایا جا سکے۔