لاہور: لاہور ایئرپورٹ پر کسٹم اہلکاروں کے ساتھ ہاتھا پائی کرنے والی تین خواتین کو رہا کر دیا گیا ہے۔ جوڈیشل مجسٹریٹ سعید احمد ورک نے کیس کا فیصلہ سناتے ہوئے تفتیشی افسر کی نااہلی پر اظہار وجوہ کا نوٹس بھی جاری کر دیا۔
عدالت نے اپنے فیصلے میں کہا کہ تفتیشی افسر مقدمے میں شواہد جمع کرنے میں ناکام رہا۔ انہوں نے نہ تو جائے وقوعہ کا دورہ کیا اور نہ ہی ریکوری کا مال عدالت میں پیش کیا۔ اس کے علاوہ تفتیشی افسر نے موقع پر موجود گواہوں کے بیانات بھی قلمبند نہیں کیے اور نہ ہی سی سی ٹی وی فوٹیج قبضے میں لی۔ عدالت نے کہا کہ ملزمان کے خلاف کوئی مواد موجود نہیں ہے جس کی بنیاد پر ان کے خلاف کارروائی کی جا سکے۔عدالت نے مزید کہا کہ تفتیشی افسر کی نااہلی پر ایک الگ سے شوکاز نوٹس جاری کیا جا رہا ہے۔
اس فیصلے کے بعد، لاہور ایئرپورٹ پر دو روز قبل پیش آنے والے اس واقعہ میں ملوث تینوں ملزمان، جن میں نور فاطمہ، ثمن خالد اور علیشہ شامل ہیں، کو رہا کرنے کا حکم دے دیا گیا۔یاد رہے کہ لاہور ایئرپورٹ پر خواتین مسافروں اور کسٹم اہلکاروں کے درمیان ہاتھا پائی کا واقعہ پیش آیا تھا، جس کے بعد ان خواتین کو گرفتار کیا گیا تھا۔
