عمرہ کی آڑمیں اٹلی جانےکی کوشش کرنے والے 5 افراد کو گرفتار کرلیا گیا
ایف آئی اے ترجمان کے مطابق امیگریشن نے کارروائی کرتے ہوئے عمرہ کی آڑمیں اٹلی جانےکی کوشش کرنے والے 5 افراد کو گرفتار کرلیا،ترجمان نے بتایا کہ راحید اللہ، عبدالحمید، عبدالشکور، اسماعیل اور احمد اللہ کو پرواز سے آف لوڈ کیا گیا، ان مسافروں کا تعلق، بنوں، پشاور، خیبر اور مہمند کے علاقوں سے ہے، پانچوں مسافروں نے سعودیہ سےایجنٹ کے ذریعے اٹلی کاغیرقانونی سفرکرنا تھا، مسافرفلائٹ پی اے170 سےعمرہ ویزے پر کراچی سے جدہ جارہے تھے جنہیں کلیئرنس کے دوران مشکوک پایا گیا۔
ترجمان کے مطابق ابتدائی تفتیش میں بتایا گیا ہے کہ مسافر پشاور کے مختلف ایجنٹوں سے رابطے میں تھے، مسافروں نے سعودی عرب سے مصر، لیبیا اور پھر غیرقانونی سمندری راستے سے اٹلی جانا تھا، اٹلی جانےکے لیے مسافروں نے ایجنٹوں سےفی کس 45 لاکھ روپے میں معاملات طےکیے تھے، مسافروں نے ایجنٹوں کو 15 لاکھ روپے فی کس لیبیا پہنچنے پر ادا کرنے تھے، تمام مسافروں کو مزید قانونی کارروائی کے لیے اینٹی ہیومن ٹریفیکنگ سرکل کراچی منتقل کردیاگیا ہے۔
