میرپورخاص:مشہور صوفی بزرگ حضرت سید شاہ مدار کا عرس منایا گیا

میرپورخاص،باغی ٹی وی (نامہ نگار سید شاہزیب شاہ کی رپورٹ )برصغیر پاک و ہند کے مشہور صوفی بزرگ حضرت سید شاہ مدار رحمتہ اللہ علیہ کا عرس مبارک میرپورخاص کے علا قے سومرو پاڑے میں پیر سید نوید علی شاہ مداروی کی سرپرستی میں منایا گیا ، جس میں ملک کے مشہور و معروف نعت خواں سید عرفان علی شاہ نے حضور پاک صلی اللہ علیہ وآلہ وسلم کی بارگاہ میں نعتوں کے نذرانے اور بزرگان دین کی منقبتیں پیش کیں

پروگرام کے دوسرے مرحلے میں مشہور و معروف قوالوں نے صوفیانہ کلام پیش کرکے حاضرین کو جھومنے پر مجبور کر دیا ۔۔ اس موقع پر پیر سید نوید علی شاہ مداروی نے کہا کہ جو لوگ اپنے اسلاف کی گئی محنت کو نظرانداز کرتے ہیں ، اللہ پاک بھی انھیں نظرانداز کردیتا ہے، انہوں نے مزید کہا اللہ پاک کا فرمان ہے کہ تم میرا ذکر کرو میں تمھارا چرچا کرونگا، تو جن لوگوں نے دین اسلام کو پھیلانے کے لئے اپنی تمام زندگی وقف کردی آج اللہ پاک انکا چرچا عام کر رہا ہے

اس موقع پر پیر سید نوید علی شاہ مداروی کے علاوہ پاکستان تحریک انصاف میرپورخاص کے صدر آفتاب احمد قریشی پرائیویٹ اسکول مینجمنٹ کے صدر فیصل خان زئی ،معروف سوشل ورکر عبدالرؤف قریشی ، پیر سید ندیم علی شاہ مداروی ،پیر سید شعیب علی شاہ مداروی، پیر سید شاہزیب علی شاہ مداروی، پیر سید سمیع علی شاہ مداروی سلسلہء مدارویہ کے سینکڑوں مریدین کے علاوہ دیگر لوگ موجود تھے ،جنہیں پروگرام کے دوران اور آخر میں لنگر تناول کرایا گیا