یمن کے دارالحکومت صنعا پر امریکی فضائی حملوں میں 12 افراد کی ہلاکت کی اطلاعات ہیں۔ یمن کے حوثی باغیوں کی وزارت صحت کے مطابق، اتوار کی رات امریکا نے صنعا کے ضلع فروا میں ایک بازار اور رہائشی علاقے پر بمباری کی جس کے نتیجے میں کم از کم 12 افراد ہلاک اور 30 زخمی ہو گئے۔
یمنی خبر رساں ایجنسی نے مزید بتایا کہ اتوار کی رات امریکا نے وسطی صوبہ مارب، مغربی شہر الحدیدہ اور شمالی علاقے صعدہ میں بھی فضائی حملے کیے۔ ان حملوں کے نتیجے میں جانی نقصان کی کوئی اطلاعات فی الحال موصول نہیں ہوئیں، تاہم یہ حملے یمن کے مختلف علاقوں میں شدت اختیار کرتے جا رہے ہیں۔
یاد رہے کہ امریکی فوج گزشتہ ایک ماہ سے یمن پر تقریباً روزانہ کی بنیاد پر فضائی کارروائیاں کر رہی ہے۔ امریکی حکومت کا کہنا ہے کہ یہ حملے حوثی دہشت گردوں کو نشانہ بنانے کے لیے کیے جا رہے ہیں تاکہ خلیج میں بین الاقوامی جہاز رانی پر حملوں کو روکا جا سکے۔گذشتہ جمعرات کو بھی یمن کے راس عیسیٰ آئل پورٹ پر امریکی فضائی حملے میں 80 افراد کی ہلاکت اور 150 افراد کے زخمی ہونے کی اطلاعات سامنے آئی تھیں۔
دوسری جانب حوثی باغی بھی امریکی فوجی جہازوں کے علاوہ اسرائیل پر بھی حملے کر چکے ہیں۔ حوثی باغی اپنی ان کارروائیوں کو غزہ کے فلسطینی عوام کے ساتھ اظہار یکجہتی قرار دیتے ہیں۔
