امریکا نے پاکستان کے ایف 16 لڑاکا طیاروں کی اپ گریڈیشن کیلئے 686 ملین ڈالر کا پیکیج منظور کرلیا۔
عرب نیوز کے مطابق منظوری کا ذکر امریکی ڈیفنس سیکیورٹی کو آپریشن ایجنسی کے اُس خط میں کیا گیا ہے جو امریکی کانگریس کو ارسال کیا گیا۔ کانگریس کو لکھے گئے خط کے مطابق نئے معاہدے میں 16 ڈیٹا لنک سسٹم، کرپٹوگرافک آلات، ایویانکس اپ گریڈ، تربیتی ماڈیولز اور جامع پائیداری سپورٹ شامل ہیں، جن کا مقصد پاکستان کے ایف 16 بیڑے کو جدید بنانا ہے۔ اس اقدام سے اسلام آباد اور واشنگٹن کے درمیان جاری انسدادِ دہشت گردی کی کوششوں کو مزید تقویت ملے گی۔
پاکستانی دفتر خارجہ نے امریکا کی جانب سے ایف 16 لڑاکا جہازوں کے اپ گریڈیشن پیکیج کی منظوری کا خیرمقدم کیا ہے اور دونوں ممالک کے معمول کے دفاعی تعاون کا حصہ قرار دیا۔میڈیا رپورٹس کے مطابق پاکستان نے پہلی بار 80ء کی دہائی میں امریکا سے ایف 16 جنگی طیارے خریدے تھے۔
