امریکی صحافی قتل کیس، ملزمان کی اپیلوںپر 18 برس بعد سنایا عدالت نے فیصلہ
باغی ٹی وی کی رپورٹ کے مطابق امریکی صحافی ڈینیل پرل قتل کیس میں سندھ ہائیکورٹ نے ملزموں کی سزا کیخلاف اپیلوں پرفیصلہ سنا دیا ہے
عدالت نے مرکزی ملزم احمد عمر شیخ کے علاوہ باقی تینوں ملزم بری کر دیئے ۔عدالت نے احمد عمر شیخ کی سزائے موت کو 7 سال قید میں تبدیل کردیا۔عدالت نے کہا ہے کہ احمد عمر شیخ پر اغوا کا الزام ثابت ہوا ،ڈینیل پرل کے قتل کا الزام کسی ملزم پر ثابت نہیں ہوا۔
سندھ ہائیکورٹ نے ملزموں کی سزا کے خلاف اپیل پر اٹھارہ برس بعد بعد فیصلہ سنایا ہے
واضح رہے کہ برطانوی شہریت رکھنے والے ملزم احمد عمر شیخ کو عدالت نے سزائے موت کا حکم دیا تھا،دیگر ملزمان فہدسلیم ،سید سلمان ثاقب اورشیخ محمد عادل کو عمر قید کی سزا سنائی گئی تھی ملزمان کو انسداد دہشت گردی کی عدالت نے 15 جولائی 2002 کو سزا سنائی تھی۔
ڈینیل پرل امریکی جریدے وال سٹریٹ جنرل جنوبی ایشیا ریجن کے بیورو چیف تھے، ملزمان کی سزاؤں کے خلاف اپیلیں 2002 سے تعطل کا شکار تھیں آج سندھ ہائیکورٹ نے اپیلوں پر فیصلہ سنایا ہے
