سعد فاروق
امریکہ کے سابق صدر ڈونلڈ ٹرمپ کی جانب سے اچانک جنگ بندی کے اعلان کے بعد ہندوستانی خارجہ سیکریٹری وکرم مصری کو ہندوتوا نظریات کے حامل سوشل میڈیا صارفین کی شدید تنقید اور حملوں کا سامنا کرنا پڑ رہا ہے۔
باغی ٹی وی کے مطابق آن لائن ٹرولز نے نہ صرف وکرم مصری کو نشانہ بنایا بلکہ ان کی بیٹیوں کو بھی تنقید کا ہدف بنایا، جس کے بعد مصری کو مجبوراً اپنا ایکس (سابقہ ٹوئٹر) اکاؤنٹ پرائیویٹ کرنا پڑا۔ سوشل میڈیا پر جاری اس منظم مہم میں وکرم مصری پر الزام لگایا جا رہا ہے کہ وہ امریکہ کے ساتھ حالیہ سفارتی کوششوں میں قصوروار ہیں، جن کے نتیجے میں ٹرمپ کی جانب سے مبینہ "غیرمتوقع جنگ بندی” کا اعلان سامنے آیا۔
یہ حملے اتنے شدید اور ذاتی نوعیت کے تھے کہ بھارتی دفتر خارجہ کو بھی اس صورتحال پر توجہ دینی پڑی، تاہم تاحال کسی سرکاری بیان میں ان حملوں کی مذمت یا وضاحت سامنے نہیں آئی ہے۔
وکرم مصری بھارت کے تجربہ کار سفارت کار ہیں اور چین سمیت کئی اہم ممالک میں سفارتی خدمات انجام دے چکے ہیں۔ ان پر اس قسم کے ذاتی حملے نہ صرف بھارتی سفارت کاری کے وقار کے لیے خطرہ ہیں بلکہ سوشل میڈیا پر بڑھتی ہوئی عدم برداشت کی بھی عکاسی کرتے ہیں۔
