ایران نے اسرائیلی جارحیت کے چوتھے روز بھی ’آپریشن وعدہ صادق 3‘ کے تحت فلسطین کے مقبوضہ علاقوں کی جانب بیلسٹک میزائل داغ دیے۔
ٹائمز آف اسرائیل کے مطابق، اسرائیلی فوج کا کہنا ہے کہ میزائل فضا میں ہیں اور اسرائیل کی جانب بڑھ رہے ہیں، حیفہ سمیت مختلف شہروں میں سائرن بجا کر شہریوں کو شیلٹرز میں منتقل ہونے کی ہدایت دی گئی۔فوجی حکام کا کہنا ہے کہ میزائل شمالی اسرائیل کے کئی علاقوں میں گر سکتے ہیں، ان حملوں کو روکنے کے لیے دفاعی کارروائی شروع کر دی گئی ہے اور شہریوں کو اگلی ہدایات تک محفوظ رہنے کی تلقین کی گئی ہے۔
ایران کی سرکاری نیوز ایجنسی مہر کے مطابق، اسرائیل کی بلااشتعال کارروائی نے تہران کو جوابی اقدام پر مجبور کیا تاکہ قوم اور ملک کی سلامتی کا دفاع کیا جا سکے.جوابی حملے کے طور پر ایران نے پیر کی شب مقبوضہ فلسطینی علاقوں پر متعدد بیلسٹک میزائل فائر کیے۔گزشتہ تین روز کے دوران ایران کی جوابی کارروائیوں میں 24 اسرائیلی شہری ہلاک اور 600 سے زائد زخمی ہو چکے ہیں۔
دوسری جانب، اسرائیلی وزیراعظم بن یامین نیتن یاہو نے تہران میں دو اہم اہداف کو نشانہ بنانے کا اعلان کیا ہے۔
رائٹرز کے مطابق، ایئر فورس ہینگر میں پائلٹس سے خطاب کرتے ہوئے نیتن یاہو نے کہا کہ اسرائیلی فضائیہ نے تہران کی فضاؤں پر کنٹرول حاصل کر لیا ہے، جو آپریشن میں بڑی کامیابی ہے۔ ہم تہران میں دو بڑے اہداف، جوہری اور میزائل خطرے کا خاتمہ کرنے جا رہے ہیں، جبکہ ایرانی حکومت اسرائیلی شہریوں کو نشانہ بنا رہی ہے۔
نیتن یاہو نے تہران کے شہریوں سے انخلا کی اپیل کرتے ہوئے کہا کہ اسرائیلی پائلٹس اور زمینی عملہ فتح کی جانب پیش قدمی کر رہے ہیں۔اسی دوران ایک فوجی ترجمان نے دعویٰ کیا کہ اسرائیل نے ایران پر فضائی برتری حاصل کر لی ہے اور ایران کے ایک تہائی زمینی میزائل لانچرز کو تباہ کر دیا ہے۔ادھر اسرائیلی قومی سلامتی کے مشیر تزاہی بانیگبی نے کہا کہ ایران پر حملوں سے مقاصد حاصل نہیں ہو سکے، کیونکہ ایران کے پاس اب بھی ہزاروں بیلسٹک میزائل موجود ہیں۔
ایران نے تبریز کے علاقے میں اسرائیل کا ایک اور F-35 طیارہ مار گرایا ہے
ایران نے دعویٰ کیا ہے کہ اس نے اسرائیل کا ایک اور F-35 جنگی طیارہ تبریز کے علاقے میں مار گرایا ہے۔ ایرانی میڈیا کے مطابق یہ کارروائی ایرانی فضائی دفاعی نظام کی کامیابی کا ثبوت ہے اور اسرائیل کو یہ سخت پیغام دینا ہے کہ ایرانی فضائی حدود کی خلاف ورزی کسی صورت برداشت نہیں کی جائے گی۔
رپورٹس کے مطابق، ایران نے اسرائیل کی مسلسل جارحیت کے جواب میں چوتھے روز بھی ’آپریشن وعدہ صادق 3‘ کے تحت جوابی کارروائی جاری رکھی اور مقبوضہ علاقوں کی جانب جدید بیلسٹک میزائل داغے۔ ایران کا کہنا ہے کہ یہ کارروائیاں اس وقت تک جاری رہیں گی جب تک اسرائیلی حملے بند نہیں کیے جاتے۔
اسرائیلی ڈرون حملے میں تہران ایئربیس پر ایران کے 2 F-14 طیارے تباہ
دی یروشلم پوسٹ کی رپورٹ کے مطابق اسرائیلی دفاعی فورس (آئی ڈی ایف) کے ایک ڈرون نے تہران ایئربیس پر ایران کے دو F-14 لڑاکا طیاروں کو اس وقت نشانہ بنایا جب وہ پرواز کی تیاری میں تھے۔
مزید یہ کہ اسرائیلی فضائیہ (آئی اے ایف) نے اسرائیل کی جانب ایرانی ڈرون حملے کی ایک کوشش کو ناکام بنایا، اور ایرانی طیارے کو تباہ کیے جانے کی ویڈیو بھی جاری کر دی گئی ہے۔
ایران کے میزائل حملے کے بعد اسرائیل نے حیفہ کی آئل ریفائنریز بند کردیں
ٹائمز آف اسرائیل کی رپورٹ کے مطابق اسرائیلی شہر حیفہ میں بیزان گروپ کے پاور پلانٹ کو ایرانی میزائل حملے میں شدید نقصان پہنچنے کے بعد بند کر دیا گیا ہے۔بیزان گروپ کی جانب سے جاری بیان میں کہا گیا ہے کہ حملے کے نتیجے میں حیفہ بے میں واقع ان کی آئل ریفائنری کی تمام تنصیبات کو مکمل طور پر بند کر دیا گیا ہے۔ کمپنی کا کہنا ہے کہ رات گئے ایرانی میزائل حملے کے دوران ریفائنری پر حملے میں 3 افراد جاں بحق ہو گئے۔
اسرائیلی فوج کے مطابق ایران کی جانب سے داغے گئے بیلسٹک میزائل فضا میں ہیں اور اسرائیلی علاقوں کی طرف بڑھ رہے ہیں۔ حکام کی جانب سے حیفہ سمیت دیگر علاقوں میں سائرن بجا کر شہریوں کو محفوظ مقامات پر منتقل ہونے کی ہدایات جاری کر دی گئی ہیں۔