اٹک (باغی ٹی وی رپورٹ)واہ کینٹ کتاب میلہ، اٹک کے ادیبوں کی نمایاں شرکت
تفصیل کے مطابق واہ کینٹ کے نیشنل بک فاؤنڈیشن کے دو روزہ کتاب میلہ میں اٹک کے معروف ادیبوں اور شاعروں نے خصوصی شرکت کی۔ وفد میں سید مونس رضا، پروفیسر سید نصرت بخاری، طاہر اسیر، ڈاکٹر شجاع اختر اعوان، راجہ زاہد حسین اور محمد طاہر شامل تھے۔
کتاب میلہ میں این بی ایف کے منیجنگ ڈائریکٹر مراد علی مہمند اور راجہ نور محمد نظامی نے وفد کا پرتپاک استقبال کیا۔ شعراء اور لکھاریوں نے اس موقع پر نیشنل بک فاؤنڈیشن کی جانب سے چھوٹے شہروں اور دیہی علاقوں میں کتاب بینی کے فروغ کے لیے کی جانے والی کوششوں کو سراہا۔
وفد نے بک اسٹالز کا تفصیلی دورہ کیا اور منتخب کتب کی خریداری بھی کی، جبکہ راجہ نور محمد نظامی کے اسٹال پر قدیم مخطوطات اور نادر مطبوعات میں خصوصی دلچسپی ظاہر کی۔
اٹک کے ادیبوں نے کتاب میلہ کے شاندار انعقاد پر منتظمین کی تعریف کرتے ہوئے امید ظاہر کی کہ اس طرح کے اقدامات علم و ادب کے فروغ میں اہم کردار ادا کریں گے۔
