خیبر پختونخوا کے ضلع نوشہرہ میں ایک افسوسناک واقعہ پیش آیا جہاں دو سگے بیٹوں نے گھریلو جھگڑے کی بنیاد پر اپنے ہی والد کو قتل کروانے کی سازش رچائی۔ پولیس نے بروقت کارروائی کرتے ہوئے اجرتی قاتل سمیت چار ملزمان کو گرفتار کرلیا ہے، جن میں مقتول کے دونوں بیٹے بھی شامل ہیں۔
پولیس کے مطابق ابتدائی تفتیش میں انکشاف ہوا ہے کہ بیٹوں کا اپنے والد کے ساتھ اکثر گھریلو مسائل پر جھگڑا رہتا تھا، جس کے باعث انہوں نے منصوبہ بندی کے تحت ایک اجرتی قاتل سے رابطہ کیا۔ ملزمان نے مالی لین دین کا وعدہ کرکے باقاعدہ طور پر قتل کرانے کا ٹھیکہ دیا۔پولیس حکام کا کہنا ہے کہ واقعے کے بعد تفتیش کا دائرہ مزید وسیع کردیا گیا ہے، اور اب تک حاصل ہونے والے شواہد کی روشنی میں مزید گرفتاریوں اور انکشافات کا امکان بھی موجود ہے۔
مزید بتایا گیا ہے کہ قتل کی واردات میں استعمال ہونے والا اسلحہ بھی برآمد کرلیا گیا ہے جبکہ ملزمان کے بیانات میں واضح تضادات سامنے آئے، جس کے بعد ان سے مزید تفتیش جاری ہے۔پولیس نے مؤقف اختیار کیا ہے کہ یہ واقعہ گھریلو تنازعات کی شدت اور خاندانی رشتوں میں بگاڑ کی ایک افسوسناک مثال ہے۔
