واربرٹن (باغی ٹی وی،نامہ نگار عبدالغفار چوہدری) تھانہ واربرٹن کی حدود میں دن دیہاڑے فائرنگ کے واقعے میں ایک شخص قتل ہوگیا۔ تفصیلات کے مطابق موٹر سائیکل سوار دو ڈاکو ضلع شیخوپورہ کے علاقے بھکھی میں واردات کے بعد ننکانہ صاحب کی حدود میں داخل ہوئے تھے۔ مقتول جمشید اکرم نے تعلق دار کی اطلاع پر ملزمان کو روکنے کی کوشش کی جس پر ڈاکوؤں نے گھونہ ٹبہ روڈ پر فائرنگ کردی۔ گولیاں لگنے سے وہ موقع پر جاں بحق ہوگیا، جبکہ ملزمان فرار ہونے میں کامیاب ہوگئے۔
اطلاع ملتے ہی پولیس کی بھاری نفری موقع پر پہنچ گئی اور تفتیش شروع کردی۔ ڈی پی او ننکانہ فراز احمد نے واقعے کا فوری نوٹس لیتے ہوئے ڈاکوؤں کی گرفتاری کے لیے خصوصی ٹیمیں تشکیل دے دی ہیں۔ ان کا کہنا ہے کہ فرار ملزمان کو جلد گرفتار کرکے قانون کے مطابق سخت سزا دلائی جائے گی۔
