واربرٹن (نامہ نگارعبدالغفار چوہدری)پولیس کی بڑی کارروائی، ڈکیت گینگ سرغنہ سمیت گرفتار، لاکھوں کی نقدی و موٹرسائیکلیں برآمد
تھانہ واربرٹن پولیس نے جرائم پیشہ عناصر کے خلاف بڑی کارروائی کرتے ہوئے ڈکیت گینگ کے سرغنہ اعجاز عرف ججی اور اس کے ساتھی رضوان کو گرفتار کر لیا۔ گرفتار ملزمان کے قبضے سے لاکھوں روپے نقدی، شہریوں سے چھینی گئی چار موٹرسائیکلیں اور ناجائز اسلحہ برآمد کر لیا گیا۔
تفصیلات کے مطابق ڈی پی او ننکانہ صاحب سید ندیم عباس کی ہدایت پر واربرٹن پولیس نے انٹیلیجنس بیسڈ کارروائی کی، جس کے دوران ملزمان کو حراست میں لے کر ان کے خلاف رابری اور موٹرسائیکل چوری سمیت 15 وارداتوں کا سراغ لگا لیا گیا ہے۔ پولیس کا کہنا ہے کہ تفتیش کا عمل جاری ہے اور مزید انکشافات کی توقع کی جا رہی ہے۔
ڈی پی او سید ندیم عباس نے پولیس ٹیم کی کارکردگی کو سراہتے ہوئے کہا کہ ڈکیت گینگ کی گرفتاری پولیس کی پیشہ وارانہ مہارت کا منہ بولتا ثبوت ہے۔ انہوں نے اس عزم کا اعادہ کیا کہ سماج دشمن عناصر کے خلاف بلا امتیاز کارروائیاں جاری رہیں گی اور عوام کے جان و مال کا تحفظ ہر صورت یقینی بنایا جائے گا۔
