دُنیا بھر میں سوئنگ کے سلطان کے لقب سے مشہور قومی کرکٹ ٹیم کے سابق کپتان وسیم اکرم کی اہلیہ شنیرا اکرم نے اپنے شوہر کا نام طلاق یافتہ افراد کی فہرست میں شامل ہونے پر شدید برہمی کا اظہار کیا ہے۔
سماجی رابطے کی ویب سائٹ ایکس پر ایک سوشل میڈیا پیج نے دنیا بھر کے مختلف ممالک سے تعلق رکھنے والے 12 کھلاڑیوں کی فہرست جاری کی تھی، جس میں ان کی طلاق ہونے کا دعویٰ کیا گیا تھا۔ اس فہرست میں پاکستانی کرکٹ ٹیم کے سابق کپتان وسیم اکرم اور بھارتی کھلاڑی انیل کمبلے کے نام بھی شامل تھے، حالانکہ حقیقت میں ان دونوں کھلاڑیوں کی طلاق نہیں ہوئی ہے۔سوشل میڈیا کی اس پوسٹ نے فوراً شنیرا اکرم کی توجہ حاصل کی، جنہوں نے جھوٹی معلومات پھیلانے والے سوشل میڈیا پیج کو سخت تنقید کا نشانہ بنایا۔ شنیرا اکرم نے اس پوسٹ کو ری شیئر کرتے ہوئے کہا کہ "بلاشبہ آپ لوگ ہر بات کو سیاق و سباق سے ہٹ کر لکھتے ہیں اور آپ کے پاس درست اور قابلِ اعتماد معلومات نہیں ہیں۔”انہوں نے مزید کہا کہ اس طرح کی خبریں شیئر کرنے سے پہلے ان کی تصدیق ضروری ہے تاکہ حقیقت کا پتہ چل سکے۔
واضح رہے کہ وسیم اکرم نے شنیرا سے پہلے ہما مفتی سے 12 اکتوبر 1993ء کو پسند کی شادی کی تھی۔ ہما مفتی ایک ماہرِ نفسیات تھیں اور انگلش لٹریچر اور سائیکالوجی میں ماسٹر کی ڈگری رکھتی تھیں۔ وہ کچھ عرصہ شوکت خانم میموریل اسپتال میں بھی کام کر چکی تھیں۔ تاہم، ہما اکرم 2009ء میں 42 سال کی عمر میں علالت کے باعث انتقال کر گئیں۔بعد ازاں، وسیم اکرم نے 2013ء میں آسٹریلوی نژاد شنیرا اکرم سے شادی کی، جن سے ان کی ایک بیٹی عائلہ ہے، جو 2014ء میں پیدا ہوئی۔
دوسری جانب، بھارتی کھلاڑی انیل کمبلے نے 1999ء میں طلاق یافتہ چیتنا رامتیرتھا سے پسند کی شادی کی تھی۔ اس جوڑی کے دو بچے ہیں، بیٹا مایاس کمبلے اور بیٹی سواستی کمبلے، اور انیل کمبلے نے سوتیلی بیٹی ارونی کو بھی گود لیا ہے۔
