ڈیرہ غازی خان : ڈویژن کے تمام سرکاری و نجی ہسپتالوں کے ویسٹ کی محفوظ تلفی، کڑی نگرانی کا فیصلہ

ڈیرہ غازیخان،باغی ٹی وی (بیوروچیف قیصرعباس جعفری)ڈیرہ غازی خان ڈویژن کے تمام سرکاری و نجی ہسپتالوں کے ویسٹ کی محفوظ تلفی کی کڑی نگرانی کا فیصلہ کیا گیا ہے کمشنر ڈاکٹر ناصر محمود بشیر نے ویڈیو لنک اجلاس کی صدارت کرتے ہوئے کمیٹی تشکیل دے دی جو ہسپتالوں اور انسینریٹرز کے اچانک معائنہ کے ساتھ متعلقہ معاملات کی جانچ پڑتال کرکے رپورٹ پیش کرے گی۔

ڈویژنل ہاسپٹلز ویسٹ سپروائزری کمیٹی کے اجلاس میں متعلقہ معاملات کا جائزہ لیا گیا۔اجلاس میں ڈپٹی کمشنرز اور متعلقہ افسران بھی شریک تھے۔کمشنر ڈاکٹر ناصر محمود بشیر نے ڈی جی خان ڈویژن کے سرکاری ٹیچنگ،ضلعی و تحصیل صدر ہسپتال اور تمام نجی ہسپتالوں کے فضلہ کی تلفی،ری سائیکلنگ کی کڑی نگرانی کے احکامات جاری کر دئیے ہیں

انہوں نے کہا کہ سرکاری و نجی ہسپتال ویسٹ کی تلفی اور دیگر معاملات کے حوالے سے روزانہ کی بنیاد پر رپورٹ پیش کی جائے۔کمشنر ڈاکٹر ناصر محمود بشیر نے کہا کہ ہسپتال کا انفیکشن ویسٹ سب سے زیادہ خطرناک ہے۔ہاسپٹلز ویسٹ کی محفوظ ترسیل و انسینریٹر کو یقینی بنایا جائے۔ہاسپٹلز ویسٹ کی غیر قانونی ہینڈلنگ پر قانون کے تحت سخت کارروائی کی جائے۔

ماحولیاتی آلودگی کم کرنے کیلئے سب کو کردار ادا کرنا ہوگا۔انہوں نے کہا کہ ڈپٹی کمشنرز،سی ای او ہیلتھ ہاسپٹلز ویسٹ کے معاملات کی خود نگرانی کریں۔ہسپتال کے فضلہ کی محفوظ تلفی کے حوالے سے تربیت اور آگاہی سیمینار منعقد کئے جائیں۔ڈی جی خان ڈویژن کے تمام سرکاری و نجی ہسپتالوں میں صفائی کو یقینی بنایا جائے۔