مرکزی ترجمان پاکستان پیپلز پارٹی پارلیمنٹرینز شازیہ مری نے بھارتی حملہ پر بیان میں کہاہے کہ بھارت کی جانب سے بلااشتعال اور غیر ضروری حملہ بین الاقوامی قوانین کی کھلی خلاف ورزی ہے-
شازیہ مری نے کہا کہ ہم اپنی بہادر افواج کو سلام پیش جنہوں ہمارا بھرپور دفاع کیا اور بھارت کی بلا اشتعال حملے کا منہ توڑ جواب دیا، بھار ت نے بلا اشتعال حملہ کرکے ہماری برداشت کو آزمانے کی کوشش کی، تو اُسے موثر اور بروقت جواب ملا، بھارتی حکومت کا غیر ذمہ دار ا نہ قدم خطے کے امن کے منہ پر طمانچہ ہے-
شازیہ مری نے کہا کہ نریندر مودی کی حکمرانی میں بھارت ایک rogue state بن چکا ہے، پی پی پی چیئرمین بلاول بھٹو بھارتی کے خلاف ایک موثر اور مضبوط آواز ہیں، پاکستان پیپلز پارٹی ہمیشہ باوقار امن کی حامی رہی ہے،بھارت نے ہمارے 31 بےگناہ معصوم شہر یوں کو نشانہ بنا کر شہید کیا ہے، تین، چار، پانچ، سات اور بارہ سال کے معصوم بچوں بھارتی جارحیت کے نتیجے میں شہید ہوگئے-
انہوں نے کہا کہ بھارتی حکومت نے حالیہ پہلگام حملے کو پاکستان سے جوڑنے کی کوشش کی مگر ثبوت پیش کرنے میں ناکام رہا،پاکستان نے پہلگام حملے کی بھرپور مذمت کی لیکن ہم بھارت کی جانب سے لگائے گئے تمام بے بنیاد الزامات کو مکمل طور پر مسترد کر چکے ہیں، یہ بھارت کا پرانا وتیرہ ہے کہ جیسے ہی کوئی واقعہ ہوتا ہے وہ بغیر کسی تحقیق کے پاکستان پر الزام دھر دیتا ہے-
شازیہ مری نے کہا کہ بھارت کا یہ طرزِ عمل صرف غیر ذمہ دارانہ ہی نہیں بلکہ خطرناک بھی ہے، بھارت اپنی اندرونی ناکامیوں اور مقبوضہ کشمیر میں انسانی حقوی کی کھلی خلاف ورزی بڑھتے سے توجہ ہٹانا چاہتا ہے، ہماری قوم متحد ہے، ہماری افواج چوکس ہیں، اور ہمارا ہر شہری ملک کی خودمختاری کے دفاع کے لیے تیار ہے-
شازیہ مری نے کہا کہ پاکستان جنگ نہیں چاہتا، لیکن اگر ہماری سرزمین، ہماری خودمختاری یا ہمارے عوام کو خطرہ ہوا تو ہم خاموش نہیں رہیں گے،عالمی برادری کو چاہیے کہ بھارت کے ان خطرناک اقدامات کا نوٹس لے، جو دو ایٹمی طاقتوں کے خطے کو تنازع کا میدان بنا سکتے ہیں، خطے کے امن کو ذاتی سیاسی فائدے کے لیے داؤ پر لگانے کی اجازت کسی کو نہیں دی جا سکتی، اگر امن کی ہماری خواہش کو کمزوری سمجھا گیا، تو ہم ہر سطح پر جواب دیں گے،ہم ایک خودمختار ملک ہیں، ایک پُرامن قوم ہیں، لیکن اگر مجبور کیا گیا، تو ہم اپنی سرزمین کا دفاع ہر صورت کریں گے-
